ek pauda aur ghas

ittifāqan ek paudā aur ghaas

baaġh meñ donoñ khaḌe haiñ paas paas

ghaas kahtī hai ki ai mere rafīq

kyā anokhā is jahāñ kā hai tarīq

hai hamārī aur tumhārī ek zaat

ek qudarat se hai donoñ kī hayāt

miTTī aur paanī havā aur raushnī

vāste donoñ ke yaksāñ hai banī

tujh pe lekin hai ināyat kī nazar

pheñk dete haiñ mujhe jaḌ khod kar

sar uThāne kī mujhe fursat nahīñ

aur havā khāne kī bhī ruḳhsat nahīñ

kaun detā hai mujhe yaañ phailne

khā liyā ghoḌe gad.he yā bail ne

tujh pe muñh Daale jo koī jānvar

us kī lī jaatī hai DanDe se ḳhabar

ole paale se bachāte haiñ tujhe

kyā hī izzat se baḌhāte haiñ tujhe

chāhte haiñ tujh ko sab karte haiñ pyaar

kuchh patā us kā batā ai dost-dār

us se paude ne kahā yuuñ sar hilā

ghaas sab sachchā hai terā ye gila

mujh meñ aur tujh meñ nahīñ kuchh bhī tamīz

sirf saaya aur meva hai aziiz

fā.eda ik roz mujh se pā.eñge

saa.e meñ baiTheñge aur phal khā.eñge

hai yahāñ izzat kā sahrā us ke sar

jis se pahuñche naf.a sab ko besh-tar

ittifaqan ek pauda aur ghas

bagh mein donon khaDe hain pas pas

ghas kahti hai ki ai mere rafiq

kya anokha is jahan ka hai tariq

hai hamari aur tumhaari ek zat

ek qudarat se hai donon ki hayat

miTTi aur pani hawa aur raushni

waste donon ke yaksan hai bani

tujh pe lekin hai inayat ki nazar

phenk dete hain mujhe jaD khod kar

sar uThane ki mujhe fursat nahin

aur hawa khane ki bhi ruKHsat nahin

kaun deta hai mujhe yan phailne

kha liya ghoDe gadhe ya bail ne

tujh pe munh Dale jo koi jaanwar

us ki li jati hai DanDe se KHabar

ole pale se bachate hain tujhe

kya hi izzat se baDhate hain tujhe

chahte hain tujh ko sab karte hain pyar

kuchh pata us ka bata ai dost-dar

us se paude ne kaha yun sar hila

ghas sab sachcha hai tera ye gila

mujh mein aur tujh mein nahin kuchh bhi tamiz

sirf saya aur mewa hai aziz

faeda ek roz mujh se paenge

sae mein baiThenge aur phal khaenge

hai yahan izzat ka sahra us ke sar

jis se pahunche nafa sab ko besh-tar