choga chunti chiDiya ke dukh

chogā chuntī chiḌiyā terī palkoñ par ugne vaale

ḳhvāboñ ke añkhue

kaun chun saktā hai

tū to ye bhī nahīñ jāntī

jaane kab koī mailī nazroñ kā jaal tujh par pheñke

aur tū be-nūr āñkhoñ ke pinjre meñ qaid ho kar

tamām umr ke liye

chahaknā bhuul jaa.e

chiḌiyā tū to paglī hai

chogā chuntī ḳhvāb dekhtī hai

tujhe kyā ma.alūm hai

kabhī kabhī ḳhvāboñ kī maañg bharne ke liye

āñkhoñ kī vīrān khiḌkiyoñ se

ThiThure hue rut jage

buuñd buuñd dil kī zamīn par Tapakte haiñ to

vahāñ duur duur tak udāsī bharā jañgal

ag aatā hai

jis par sivā.e dukh dard ke koī phal nahīñ lagtā

magar bholī chiḌiyā

tū ye sab nahīñ jāntī

shāyad kabhī jaan bhī nahīñ saktī

choga chunti chiDiya teri palkon par ugne wale

KHwabon ke ankhue

kaun chun sakta hai

tu to ye bhi nahin jaanti

jaane kab koi maili nazron ka jal tujh par phenke

aur tu be-nur aankhon ke pinjre mein qaid ho kar

tamam umr ke liye

chahakna bhul jae

chiDiya tu to pagli hai

choga chunti KHwab dekhti hai

tujhe kya malum hai

kabhi kabhi KHwabon ki mang bharne ke liye

aankhon ki viran khiDkiyon se

ThiThure hue rut jage

bund bund dil ki zamin par Tapakte hain to

wahan dur dur tak udasi bhara jangal

ag aata hai

jis par siwae dukh dard ke koi phal nahin lagta

magar bholi chiDiya

tu ye sab nahin jaanti

shayad kabhi jaan bhi nahin sakti