christmas ka daraKHt

maiñ bhī huuñ goyā christmas kā daraḳht

merā rishta bhī zamīñ se āsmāñ se aur havā se kaT chukā

baaġh chhūTā khetiyāñ chhūTīñ

maiñ ghar ke markazī kamre meñ aa kar DaT chukā

mere bachchoñ ne sajāyā hai mujhe

raushnī ke nanhe nanhe bulb Tāñke haiñ mirī bāñhoñ ke saath

merī shāḳhoñ meñ haiñ tohfe

muḳhtalif rangoñ ke kāġhaz aur sunahre tape meñ lipTe hue

hai raqam har ek tohfe par koī mānūs naam

raat hogī aur dinner ke ba.ad mere paas sab aa jā.eñge

merī biivī mere bachche mere dost

merī shāḳhoñ se utāre jā.eñge tohfe tamām

jāgtī soī huī guḌiyā

damaktī dhāriyoñ vaalā frock

mere beTe ke liye bandūq

jis se vo karegā uḌtī chiḌiyoñ kā shikār

merī biivī ke liye necklace chamaktā pur-vaqār

aur bhī tohfe bahut se be-shumār

aur bachchoñ ke liye aur apne pyāroñ ke liye

jab guzar jā.egī shab

baT chukeñge saare tohfe bujh chukeñge bulb sab

maiñ drawing-rōm kī be-kār shai ho jā.ūñgā

mere sūkhe zard-pattoñ kī mahak

jāgtī-jītī fazā meñ kab talak

phir mirī biivī kahegī

aao bachcho ghar kī zebā.ish na.e sire se kareñ

pheñk deñ ab ghar se bāhar ye christmas kā daraḳht

pattā pattā us kī har ik shāḳh kā murjhā gayā

ab nayā saal aa gayā

main bhi hun goya christmas ka daraKHt

mera rishta bhi zamin se aasman se aur hawa se kaT chuka

bagh chhuTa khetiyan chhuTin

main ghar ke markazi kamre mein aa kar DaT chuka

mere bachchon ne sajaya hai mujhe

raushni ke nanhe nanhe bulb Tanke hain meri banhon ke sath

meri shaKHon mein hain tohfe

muKHtalif rangon ke kaghaz aur sunahre tape mein lipTe hue

hai raqam har ek tohfe par koi manus nam

raat hogi aur dinner ke baad mere pas sab aa jaenge

meri biwi mere bachche mere dost

meri shaKHon se utare jaenge tohfe tamam

jagti soi hui guDiya

damakti dhaariyon wala frock

mere beTe ke liye banduq

jis se wo karega uDti chiDiyon ka shikar

meri biwi ke liye necklace chamakta pur-waqar

aur bhi tohfe bahut se be-shumar

aur bachchon ke liye aur apne pyaron ke liye

jab guzar jaegi shab

baT chukenge sare tohfe bujh chukenge bulb sab

main drawing-room ki be-kar shai ho jaunga

mere sukhe zard-patton ki mahak

jagti-jiti faza mein kab talak

phir meri biwi kahegi

aao bachcho ghar ki zebaish nae sire se karen

phenk den ab ghar se bahar ye christmas ka daraKHt

patta patta us ki har ek shaKH ka murjha gaya

ab naya sal aa gaya