کرسمس کا درخت

میں بھی ہوں گویا کرسمس کا درخت

میرا رشتہ بھی زمیں سے آسماں سے اور ہوا سے کٹ چکا

باغ چھوٹا کھیتیاں چھوٹیں

میں گھر کے مرکزی کمرے میں آ کر ڈٹ چکا

میرے بچوں نے سجایا ہے مجھے

روشنی کے ننھے ننھے بلب ٹانکے ہیں مری بانہوں کے ساتھ

میری شاخوں میں ہیں تحفے

مختلف رنگوں کے کاغذ اور سنہرے ٹیپ میں لپٹے ہوئے

ہے رقم ہر ایک تحفے پر کوئی مانوس نام

رات ہوگی اور ڈنر کے بعد میرے پاس سب آ جائیں گے

میری بیوی میرے بچے میرے دوست

میری شاخوں سے اتارے جائیں گے تحفے تمام

جاگتی سوئی ہوئی گڑیا

دمکتی دھاریوں والا فراک

میرے بیٹے کے لیے بندوق

جس سے وہ کرے گا اڑتی چڑیوں کا شکار

میری بیوی کے لئے نکلس چمکتا پر وقار

اور بھی تحفے بہت سے بے شمار

اور بچوں کے لئے اور اپنے پیاروں کے لیے

جب گزر جائے گی شب

بٹ چکیں گے سارے تحفے بجھ چکیں گے بلب سب

میں ڈرائنگ روم کی بیکار شے ہو جاؤں گا

میرے سوکھے زرد پتوں کی مہک

جاگتی جیتی فضا میں کب تلک

پھر مری بیوی کہے گی

آؤ بچو گھر کی زیبائش نئے سرے سے کریں

پھینک دیں اب گھر سے باہر یہ کرسمس کا درخت

پتا پتا اس کی ہر اک شاخ کا مرجھا گیا

اب نیا سال آ گیا