chyunTiyan

chyūñTiyāñ zamīn par kitne kos chaltī hoñgī

aur kitnī hamāre pairoñ tale aa kar masal jaatī hoñgī

is kā shumār nahīñ

lekin jab ye hamāre badan par chaltī haiñ

to ham unheñ gin sakte haiñ

in kī masāfat kā andāza lagā sakte haiñ

tum apne badan par kāTtī chyūñTī ko

kaise alag karte ho

ye chyūñTī batā saktī hai

yā is ke TuuTe hue a.azā

tum chiyūñTiyoñ ke gharoñ ke baare meñ

is se zyāda nahīñ jaan sakte

ki vo darvāzoñ kī rīḳhoñ

yā dīvāroñ kī darāḌoñ meñ rahtī haiñ

yā raat bhar chaltī rahtī haiñ

lekin tum ye nahīñ jaan sakte

ye kahāñ mil baiThtī haiñ

kahāñ ḳhufiya mētingeñ kartī haiñ

lekin jab tum shahd ke martabān shakar ke Dabbe

yā gosht ke TukḌe kī tarah

in ke khāne kā zaḳhīra ban jāoge

to vo an-ginat jam.a ho kar

tumhāre an-ginat TukḌoñ ko aapas meñ baañT leñgī

aur tumheñ darvāze kī rīḳhoñ

aur dīvāroñ kī darāḌoñ ke andarūnī hisse dikhā.eñgī

aur vo goshe bhī

jahāñ unhoñ ne ḳhufiya mētingeñ kī thiiñ

chyunTiyan zamin par kitne kos chalti hongi

aur kitni hamare pairon tale aa kar masal jati hongi

is ka shumar nahin

lekin jab ye hamare badan par chalti hain

to hum unhen gin sakte hain

in ki masafat ka andaza laga sakte hain

tum apne badan par kaTti chyunTi ko

kaise alag karte ho

ye chyunTi bata sakti hai

ya is ke TuTe hue aaza

tum chiyunTiyon ke gharon ke bare mein

is se zyaada nahin jaan sakte

ki wo darwazon ki riKHon

ya diwaron ki daraDon mein rahti hain

ya raat bhar chalti rahti hain

lekin tum ye nahin jaan sakte

ye kahan mil baiThti hain

kahan KHufiya meetingen karti hain

lekin jab tum shahd ke martaban shakar ke Dabbe

ya gosht ke TukDe ki tarah

in ke khane ka zaKHira ban jaoge

to wo an-ginat jama ho kar

tumhaare an-ginat TukDon ko aapas mein banT lengi

aur tumhein darwaze ki riKHon

aur diwaron ki daraDon ke andaruni hisse dikhaengi

aur wo goshe bhi

jahan unhon ne KHufiya meetingen ki thin