cigarette

jis tarah hasratoñ ke marghaT meñ

dhīre dhīre sulag rahā ho dhuāñ

jis tarah ho kisī sitāre par

ek bujhte hue diye kā gumāñ

jis tarah miT rahī ho ban ban kar

yās-angez vaqt kī tahrīr

is tarah tere surḳh hoñToñ par

kāñptī hai ghane dhueñ kī lakīr

khelte haiñ fazā kī sāñsoñ se

nanhe nanhe tilismī mar gole

halke niile dhueñ kī lahroñ se

Dhulne lagtī hai gard rañj-o-mehan

tere har ek kash kī talḳhī meñ

Duub jaatī hai zindagī kī thakan

hashr-sāmāniyāñ tafakkur kī

jab bhī letī haiñ dil meñ añgḌā.ī

tujh ko rah rah ke yaad kartī hai

shām-e-ġham kī udaas tanhā.ī

ye to sab kuchh durust hai lekin

aaj kī raat maiñ akelā huuñ

band kamra hai aur ḳhāmoshī

hādse kar rahe haiñ merī talāsh

zehan ko Das rahī hai fikr-e-ma.āsh

kyā karūñ kyā karūñ kidhar jā.ūñ

tujh se kis tarah dil ko bahlā.ūñ

sochtā huuñ ki ġharq ho jā.ūñ

tere kaḌve dhueñ kī ḳhushbū meñ

lekin aisā bhī ho nahīñ saktā

tere kaḌve dhueñ kī ḳhushbū meñ

ġham kā ehsās kho nahīñ saktā

tū mire ġham ko kyā miTā.egā

tū bhī merī tarah hai shoa.la-fishāñ

mere siine meñ jal rahī hai aag

tere siine se uTh rahā hai dhuāñ

mere dil meñ bhī soz paltā hai

maiñ bhī jaltā huuñ tū bhī jaltā hai

jis tarah hasraton ke marghaT mein

dhire dhire sulag raha ho dhuan

jis tarah ho kisi sitare par

ek bujhte hue diye ka guman

jis tarah miT rahi ho ban ban kar

yas-angez waqt ki tahrir

is tarah tere surKH honTon par

kanpti hai ghane dhuen ki lakir

khelte hain faza ki sanson se

nanhe nanhe tilismi mar gole

halke nile dhuen ki lahron se

Dhulne lagti hai gard ranj-o-mehan

tere har ek kash ki talKHi mein

Dub jati hai zindagi ki thakan

hashr-samaniyan tafakkur ki

jab bhi leti hain dil mein angDai

tujh ko rah rah ke yaad karti hai

sham-e-gham ki udas tanhai

ye to sab kuchh durust hai lekin

aaj ki raat main akela hun

band kamra hai aur KHamoshi

hadse kar rahe hain meri talash

zehan ko Das rahi hai fikr-e-maash

kya karun kya karun kidhar jaun

tujh se kis tarah dil ko bahlaun

sochta hun ki gharq ho jaun

tere kaDwe dhuen ki KHushbu mein

lekin aisa bhi ho nahin sakta

tere kaDwe dhuen ki KHushbu mein

gham ka ehsas kho nahin sakta

tu mere gham ko kya miTaega

tu bhi meri tarah hai shoala-fishan

mere sine mein jal rahi hai aag

tere sine se uTh raha hai dhuan

mere dil mein bhi soz palta hai

main bhi jalta hun tu bhi jalta hai