coffee-house

din-bhar coffē-house meñ baiThe kuchh duble-patle naqqād

bahs yahī karte rahte haiñ sust adab kī hai raftār

sirf adab ke ġham meñ ġhaltāñ chalne phirne se lāchār

chehroñ se zāhir hotā hai jaise barsoñ ke bīmār

urdu-adab meñ Dhaa.ī haiñ shā.er 'mīr' o 'ġhālib' aadhā 'josh'

yā ik-ādh kisī kā misra yā 'iqbāl' ke chand ash.ār

yā phir nazm hai ik chūhe par hāmid-'madnī' kā shahkār

koī nahīñ hai achchhā shā.er koī nahīñ afsāna-nigār

'manTo' 'kirshn' 'nadīm' aur 'bedī' in meñ jaan to hai lekin

aib ye hai in ke hāthoñ meñ kund zabāñ kī hai talvār

'ālī' afsar 'inshā' baabū 'nāsir' 'mīr' ke bar-ḳhurdār

'faiz' ne jo ab tak likkhā hai kyā likkhā hai sab be-kār

un ko adab kī sehhat kā ġham mujh ko un kī sehhat kā

ye bechāre dukh ke maare jiine se haiñ kyuuñ be-zār

husn se vahshat ishq se nafrat apnī hī sūrat se pyaar

ḳhanda-e-gul par ek tabassum girya-e-shabnam se inkār

din-bhar coffee-house mein baiThe kuchh duble-patle naqqad

bahs yahi karte rahte hain sust adab ki hai raftar

sirf adab ke gham mein ghaltan chalne phirne se lachaar

chehron se zahir hota hai jaise barson ke bimar

urdu-adab mein Dhai hain shaer 'mir' o 'ghaalib' aadha 'josh'

ya ik-adh kisi ka misra ya 'iqbaal' ke chand ashaar

ya phir nazm hai ek chuhe par hamid-'madni' ka shahkar

koi nahin hai achchha shaer koi nahin afsana-nigar

'manTo' 'kirshn' 'nadim' aur 'bedi' in mein jaan to hai lekin

aib ye hai in ke hathon mein kund zaban ki hai talwar

'ali' afsar 'insha' babu 'nasir' 'mir' ke bar-KHurdar

'faiz' ne jo ab tak likkha hai kya likkha hai sab be-kar

un ko adab ki sehhat ka gham mujh ko un ki sehhat ka

ye bechaare dukh ke mare jine se hain kyun be-zar

husn se wahshat ishq se nafrat apni hi surat se pyar

KHanda-e-gul par ek tabassum girya-e-shabnam se inkar