wo aurat thi

ḳhalā kī mushkilāt apnī jagah qaa.em thiiñ aur duniyā

ujaḌtī bharbharī banjar zamīnoñ kī nishānī thī

sitāre surḳh the aur chāñd sūraj par añdheroñ kā baserā thā

daraḳhtoñ par parindoñ kī jagah vīrāniyoñ ke ghoñsle hote

zamīñ kī kokh meñ bas thuur thā aur ḳhaar ugte the

havā ko saañs lene meñ bahut dushvāriyāñ hotīñ

to phir us nuur vaale ne koī lauh-e-anāra bhej dī shāyad

añdhere raushnī pe kis tarah īmān le aa.e

balā.eñ kis tarah pariyoñ kī sūrat meñ chalī aa.iiñ

ye kis naural suvaibā kī ḳhudā taḳhlīq kar baiThā

ye narmī dilbarī sharm-o-hayā taḳhlīq kar baiThā

vo naural vo suvaibā jis kī ḳhātir āsmāñ se rañg utre the

vo jis ke dam se duniyā par nazākat kā vajūd aayā

ḳhudā-e-ḳhalq ne naural se pahle hī havas taḳhlīq kar dī thī

nazākat tak havas kī dastaras taḳhlīq kar dī thī

hazāroñ saal guzre haiñ magar fitrat nahīñ badlī

nigāheñ ab bhī bhūkī haiñ ki jaise khā hī jā.eñgī

havas-zādoñ ne kaise nuur se muñh par malī kālak

har ik rishta zarūrat ke mutābiq kis liye badlā

havas-zādoñ badan-ḳhoro zarā sī sharm farmāo

vo naural vo suvaibā raushnī kā isti.āra thī

kabhī havvā kabhī mariyam kabhī lauhe-anāra thī

vo aurat thī

KHala ki mushkilat apni jagah qaem thin aur duniya

ujaDti bharbhari banjar zaminon ki nishani thi

sitare surKH the aur chand suraj par andheron ka basera tha

daraKHton par parindon ki jagah viraniyon ke ghonsle hote

zamin ki kokh mein bas thur tha aur KHar ugte the

hawa ko sans lene mein bahut dushwariyan hotin

to phir us nur wale ne koi lauh-e-anara bhej di shayad

andhere raushni pe kis tarah iman le aae

balaen kis tarah pariyon ki surat mein chali aain

ye kis naural suwaiba ki KHuda taKHliq kar baiTha

ye narmi dilbari sharm-o-haya taKHliq kar baiTha

wo naural wo suwaiba jis ki KHatir aasman se rang utre the

wo jis ke dam se duniya par nazakat ka wajud aaya

KHuda-e-KHalq ne naural se pahle hi hawas taKHliq kar di thi

nazakat tak hawas ki dastaras taKHliq kar di thi

hazaron sal guzre hain magar fitrat nahin badli

nigahen ab bhi bhuki hain ki jaise kha hi jaengi

hawas-zadon ne kaise nur se munh par mali kalak

har ek rishta zarurat ke mutabiq kis liye badla

hawas-zadon badan-KHoro zara si sharm farmao

wo naural wo suwaiba raushni ka istiara thi

kabhi hawwa kabhi mariyam kabhi lauhe-anara thi

wo aurat thi