daere

maiñ apnī sochoñ ke dā.eroñ meñ

talāshtā huuñ usī bashar ko

jo dā.eroñ kā makīñ nahīñ hai

jise hai pābandiyoñ se nafrat

jo bandishoñ kā amiiñ nahīñ hai

jo sāmne hai magar nahīñ hai

maiñ apnī sochoñ ke zāviyoñ ko

badalnā chāhūñ to kaise badlūñ

ki dā.ere to haiñ tiin sau saaTh degrēyoñ kī fasīl aisī

nahīñ hai rāh-e-farār jis meñ

maiñ apnā rasta badalnā chāhūñ to kaise badlūñ

jahāñ se bhī ibtidā karūñgā

vahīñ pe hī iḳhtitām hogā

maiñ dā.eroñ meñ bhaTak rahā huuñ

talāshtā huuñ pukārtā huuñ usī bashar ko

jo mere andar chhupā huā hai

maiñ ḳhud bhī aisā hī dā.era huuñ

jo apne andar bhaTak rahā hai

mirī ye āñkheñ kuchh aise sapnoñ ko bun rahī haiñ

jo dā.eroñ kī hudūd se hī nā-āshnā haiñ

maiñ apnī āñkhoñ ke dā.eroñ meñ utar sakūñ to

vo laal Dorī udheḌ Dālūñ

jo aise sapnoñ ko bun rahī hai

ki jin kī ta.abīr maiñ nahīñ huuñ

main apni sochon ke daeron mein

talashta hun usi bashar ko

jo daeron ka makin nahin hai

jise hai pabandiyon se nafrat

jo bandishon ka amin nahin hai

jo samne hai magar nahin hai

main apni sochon ke zawiyon ko

badalna chahun to kaise badlun

ki daere to hain tin sau saTh degreeyon ki fasil aisi

nahin hai rah-e-farar jis mein

main apna rasta badalna chahun to kaise badlun

jahan se bhi ibtida karunga

wahin pe hi iKHtitam hoga

main daeron mein bhaTak raha hun

talashta hun pukarta hun usi bashar ko

jo mere andar chhupa hua hai

main KHud bhi aisa hi daera hun

jo apne andar bhaTak raha hai

meri ye aankhen kuchh aise sapnon ko bun rahi hain

jo daeron ki hudud se hi na-ashna hain

main apni aankhon ke daeron mein utar sakun to

wo lal Dori udheD Dalun

jo aise sapnon ko bun rahi hai

ki jin ki tabir main nahin hun