daere

ūñche makānoñ kī dīvāroñ par harī bharī phūloñ kī bel

surma.ī bādaloñ ke ghuñghaT se merī chhoTī khiḌkī kī taraf

dekhtī hai

persuaders T.v par film chal rahī hai

maiñ kis ke ta.āqub meñ apnī taraf bhaag rahī huuñ

maiñ kolhū kā bail huuñ

roz ek dā.era apne ird-gird khīñchtī huuñ aur is dā.ere

ke aage ek aur dā.era phir ek aur

yuuñ aage hī aage dā.ere hī dā.ere

zindagī kā safar dā.eroñ se likhā gayā

subah dopahar shaam aañsū kī roTī dukh kā sālan aur

sard aahoñ kā paanī

barsātoñ kī shāmeñ nirmal komal dil ko yuuñ dahlātī haiñ

jaise ātish-dān kī qarīb soī billī an-jāne qadmoñ se chauñk jaa.e

ye bhī ek dā.era hai

is dā.ere ke andar hamāre hathiyār zamīn par paḌte haiñ

aur ham haath uThā.e āsmānī āvāz par

aage hī aage be-samt chalte jā rahe haiñ

dā.ere bante jā rahe haiñ

unche makanon ki diwaron par hari bhari phulon ki bel

surmai baadalon ke ghunghaT se meri chhoTi khiDki ki taraf

dekhti hai

persuaders Tw par film chal rahi hai

main kis ke taaqub mein apni taraf bhag rahi hun

main kolhu ka bail hun

roz ek daera apne ird-gird khinchti hun aur is daere

ke aage ek aur daera phir ek aur

yun aage hi aage daere hi daere

zindagi ka safar daeron se likha gaya

subah dopahar sham aansu ki roTi dukh ka salan aur

sard aahon ka pani

barsaton ki shamen nirmal komal dil ko yun dahlati hain

jaise aatish-dan ki qarib soi billi an-jaane qadmon se chaunk jae

ye bhi ek daera hai

is daere ke andar hamare hathiyar zamin par paDte hain

aur hum hath uThae aasmani aawaz par

aage hi aage be-samt chalte ja rahe hain

daere bante ja rahe hain