daeron ki fasilon se Darte ho

dā.ere se TuuT kar gir paḌeñge abhī

aur ham apne hone kī pādāsh meñ

būḌhī sadiyoñ kī TuuTī huī qaus par

ek tārīk nuqte meñ kho jā.eñge

dā.eroñ ke maqābir meñ so jā.eñge

dā.ere ḳhvāhishoñ ke maqābir sahī

dā.ere aarzū ke mīnār haiñ

dā.ere be-sabātī ke marqad nahīñ

dā.ere guzre vaqtoñ ke āsār haiñ

dā.eroñ kī fasīloñ meñ lipTe hue

an-ginat log jīvan se bezār haiñ

jaane din ke lahū se siyah-rāt ko

haath dhone meñ kaisī masarrat milī

kaise kaise javāñ-mard the jo kabhī

chāñdnī ke safar par ravāna hue

mausamoñ kī tamāzat ko oḌhe hue

nā-rasā.ī ke āzār meñ kho ga.e

kitne taare ḳhalāoñ kī dahlīz par

raat ke dasht-e-vīrān meñ so ga.e

dā.eroñ kī fasīloñ se girtā lahū

shahr ke be-navāoñ kā tāvān hai

jangaloñ meñ bhaTaktī sadā kī tarah

shahr kā har sadā-kār be-jān hai

be-gharoñ kī tarah besvā kī tarah

kohsāroñ se uljhī havā kī tarah

shahar ke chauk meñ naqsh-e-pā kī tarah

dā.eroñ kī fasīloñ se Darte raho

zard pattoñ kī sūrat havā kī tarah

daere se TuT kar gir paDenge abhi

aur hum apne hone ki padash mein

buDhi sadiyon ki TuTi hui qaus par

ek tarik nuqte mein kho jaenge

daeron ke maqabir mein so jaenge

daere KHwahishon ke maqabir sahi

daere aarzu ke minar hain

daere be-sabaati ke marqad nahin

daere guzre waqton ke aasar hain

daeron ki fasilon mein lipTe hue

an-ginat log jiwan se bezar hain

jaane din ke lahu se siyah-raat ko

hath dhone mein kaisi masarrat mili

kaise kaise jawan-mard the jo kabhi

chandni ke safar par rawana hue

mausamon ki tamazat ko oDhe hue

na-rasai ke aazar mein kho gae

kitne tare KHalaon ki dahliz par

raat ke dasht-e-viran mein so gae

daeron ki fasilon se girta lahu

shahr ke be-nawaon ka tawan hai

jangalon mein bhaTakti sada ki tarah

shahr ka har sada-kar be-jaan hai

be-gharon ki tarah beswa ki tarah

kohsaron se uljhi hawa ki tarah

shahar ke chauk mein naqsh-e-pa ki tarah

daeron ki fasilon se Darte raho

zard patton ki surat hawa ki tarah