dal ki fariyaad

ek laḌkī baghārtī hai daal

daal kartī hai arz yuuñ ahvāl

ek din thā harī-bharī thī maiñ

saarī āfāt se barī thī maiñ

thā harā khet merā gahvāra

vo vatan thā mujhe bahut pyārā

paanī pī pī ke thī maiñ lahrātī

dhuup letī kabhī havā khātī

meñh barastā thā jhoñke aate the

godiyoñ meñ mujhe khilāte the

yahī sūraj zamīñ the maañ baavā

mujh se karte the nek bartāvā

jab kiyā mujh ko pāl-pos baḌā

aah zālim kisān aan paḌā

ga.ī taqdīr yak-ba-yak jo palaT

khet kā khet kar diyā talpaT

ḳhuub luuTā dhaḌī dhaḌī kar ke

mujh ko gaunoñ meñ le ga.e bhar ke

ho ga.ī dam ke dam meñ barbādī

chhin ga.ī haa.e merī āzādī!

kyā batā.ūñ kahāñ kahāñ khīñchā

dāl-manDī meñ mujh ko jā bechā

ek zālim se vaañ paḌā paalā

jis ne chakkī meñ mujh ko dal Daalā

huā taqdīr kā likhā puurā

donoñ pāToñ ne kar diyā chūrā

na sunī merī aah aur zaarī

ḳhuub baniye ne kī ḳharīdārī

chhānā chhalnī meñ chhāj meñ phaTkā

qaid-ḳhāna mirā banā maTkā

phir muqaddar mujhe yahāñ laayā

tum ne to aur bhī ġhazab Dhāyā

khaal khīñchī alag kiye chhilke

zaḳhm kyūñ-kar hare na hoñ dil ke

Dālīñ marcheñ namak lagāyā ḳhuub

rakh ke chūlhe pe jī jalāyā ḳhuub

us pe kaf-gīr ke bhī Thoke haiñ

aur nāḳhun ke bhī kachoke haiñ

mere galne kī le rahī ho ḳhabar

daañt hai aap kā mire uupar

garm ghī kar ke mujh ko daaġh diyā

haa.e tum ne bhī kuchh na rahm kiyā

haath dho kar paḌī ho pīchhe tum

jaan par aa banī havās haiñ gum

achchhī bī-bī tumhīñ karo insāf

zulm hai yā nahīñ qusūr-muāf

kahā laḌkī ne merī pyārī daal

mujh ko ma.alūm hai tirā sab haal

tū agar khet se nahīñ aatī

ḳhaak meñ mil ke ḳhaak ho jaatī

yā koī gaa.e bhaiñs char letī

peT meñ apne tujh ko bhar letī

maiñ to rutba tirā baḌhātī huuñ

ab chapātī se tujh ko khātī huuñ

na satānā na jī jalānā thā

yuuñ tujhe aadmī banānā thā

aglī biitī kā tū na kar kuchh ġham

mehrbānī thī sab, na thā ye sitam

ek laDki baghaarti hai dal

dal karti hai arz yun ahwal

ek din tha hari-bhari thi main

sari aafat se bari thi main

tha hara khet mera gahwara

wo watan tha mujhe bahut pyara

pani pi pi ke thi main lahraati

dhup leti kabhi hawa khati

meinh barasta tha jhonke aate the

godiyon mein mujhe khilate the

yahi suraj zamin the man bawa

mujh se karte the nek bartawa

jab kiya mujh ko pal-pos baDa

aah zalim kisan aan paDa

gai taqdir yak-ba-yak jo palaT

khet ka khet kar diya talpaT

KHub luTa dhaDi dhaDi kar ke

mujh ko gaunon mein le gae bhar ke

ho gai dam ke dam mein barbaadi

chhin gai hae meri aazadi!

kya bataun kahan kahan khincha

dal-manDi mein mujh ko ja becha

ek zalim se wan paDa pala

jis ne chakki mein mujh ko dal Dala

hua taqdir ka likha pura

donon paTon ne kar diya chura

na suni meri aah aur zari

KHub baniye ne ki KHaridari

chhana chhalni mein chhaj mein phaTka

qaid-KHana mera bana maTka

phir muqaddar mujhe yahan laya

tum ne to aur bhi ghazab Dhaya

khaal khinchi alag kiye chhilke

zaKHm kyun-kar hare na hon dil ke

Dalin marchen namak lagaya KHub

rakh ke chulhe pe ji jalaya KHub

us pe kaf-gir ke bhi Thoke hain

aur naKHun ke bhi kachoke hain

mere galne ki le rahi ho KHabar

dant hai aap ka mere upar

garm ghi kar ke mujh ko dagh diya

hae tum ne bhi kuchh na rahm kiya

hath dho kar paDi ho pichhe tum

jaan par aa bani hawas hain gum

achchhi bi-bi tumhin karo insaf

zulm hai ya nahin qusur-muaf

kaha laDki ne meri pyari dal

mujh ko malum hai tera sab haal

tu agar khet se nahin aati

KHak mein mil ke KHak ho jati

ya koi gae bhains char leti

peT mein apne tujh ko bhar leti

main to rutba tera baDhati hun

ab chapati se tujh ko khati hun

na satana na ji jalana tha

yun tujhe aadmi banana tha

agli biti ka tu na kar kuchh gham

mehrbani thi sab, na tha ye sitam