dawat-e-amal

tū samajhtā hai jise manzil-e-īsār-o-amal

vo abhī tishna-e-takmīl-e-safar hai ai dost

jis pe chalte hue ik umr-e-safar guzrī hai

sāmne phir bhī vahī rāhguzar hai ai dost

nuur kyā nuur kā partav bhī nahīñ hai is meñ

shab-e-tārīk ba-unvān-e-sahar hai ai dost

laakh chehroñ pe numāyāñ hoñ masarrat ke nuqūsh

zindagī ġham-kada-e-qalb-o-nazar hai ai dost

ho vahāñ qadr-e-javāhir kā kise fikr-o-ḳhayāl

sang-rezoñ kā jahāñ naam guhar hai ai dost

chār-sū chaak hai aadam kī qabā-e-ismat

har bashar dushman-e-taqdīs-e-bashar hai ai dost

koī sūrat nahīñ ārām-e-nasheman kī nasīb

kāmrāñ silsila-e-barq-o-sharar hai ai dost

nasl-e-insāñ ko milīñ jis se nishānāt-e-urūj

un maqāmāt kī ab kis ko ḳhabar hai ai dost

kāġhazī phūloñ meñ ḳhushbū kā yaqīñ hai tujh ko

apnī pastī kā kuchh ehsās nahīñ hai tujh ko

tu samajhta hai jise manzil-e-isar-o-amal

wo abhi tishna-e-takmil-e-safar hai ai dost

jis pe chalte hue ek umr-e-safar guzri hai

samne phir bhi wahi rahguzar hai ai dost

nur kya nur ka partaw bhi nahin hai is mein

shab-e-tarik ba-unwan-e-sahar hai ai dost

lakh chehron pe numayan hon masarrat ke nuqush

zindagi gham-kada-e-qalb-o-nazar hai ai dost

ho wahan qadr-e-jawahir ka kise fikr-o-KHayal

sang-rezon ka jahan nam guhar hai ai dost

chaar-su chaak hai aadam ki qaba-e-ismat

har bashar dushman-e-taqdis-e-bashar hai ai dost

koi surat nahin aaram-e-nasheman ki nasib

kaamran silsila-e-barq-o-sharar hai ai dost

nasl-e-insan ko milin jis se nishanat-e-uruj

un maqamat ki ab kis ko KHabar hai ai dost

kaghazi phulon mein KHushbu ka yaqin hai tujh ko

apni pasti ka kuchh ehsas nahin hai tujh ko