dawat-e-inqilab

insāniyat kā az-sar-e-nau haq adā kareñ

phir bāb-e-inqalāb-e-vatan aaj vā kareñ

uTh halqa-e-farang kī har saf ko toḌ kar

phir hurriyat ko dām-e-ḳhirad se rihā kareñ

kuchh rah ga.iiñ ragoñ meñ haiñ būñdeñ jo ḳhuun kī

mehrāb-e-amn-e-hind pe chal kar fidā kareñ

barsā.eñ inqalāb kī paiham vo bārisheñ

rangīn aaj chehra-e-mauj-e-sabā kareñ

phir ġharq kar ke maz.hab-e-nau kī har ek shai

is hind-e-bad-nasīb ke haq meñ duā kareñ

har shai hai inqalāb ke qadmoñ pe sajda-rez

aise meñ ham namāz-e-baġhāvat qazā kareñ

insaniyat ka az-sar-e-nau haq ada karen

phir bab-e-inqalab-e-watan aaj wa karen

uTh halqa-e-farang ki har saf ko toD kar

phir hurriyat ko dam-e-KHirad se riha karen

kuchh rah gain ragon mein hain bunden jo KHun ki

mehrab-e-amn-e-hind pe chal kar fida karen

barsaen inqalab ki paiham wo barishen

rangin aaj chehra-e-mauj-e-saba karen

phir gharq kar ke mazhab-e-nau ki har ek shai

is hind-e-bad-nasib ke haq mein dua karen

har shai hai inqalab ke qadmon pe sajda-rez

aise mein hum namaz-e-baghawat qaza karen