da’wat-e-nagawar

mujh ko daulat kī khanak na sunā ai dost

mere kānoñ ko is āvāz se nafrat hai

rah-rah ke khaTaktī hai āñkhoñ meñ merī

ye jo terī numā.ish-e-māl-o-hashmat hai

hai ḳhuub terī ḳhātir-dārī aur tavāzo'

mai-e-gulfām ke jaam chhalakte haiñ har-sū

'itr-āgīñ hai saarā māhaul magar dost

aa.e na kahīñ se bhī kuchh iḳhlās kī bū

jaam uThātā huuñ to kaañp uThte haiñ haath

ho koī lahū se labrez piyāla jaise

lazzat-āmez kabāb utreñ na halaq se

bhūke muñh se chhīn liyā ho nivāla jaise

ye mu'azzaz mehmāñ ye masnū'ī muskāneñ

har mad'ū se hai tujhe kuchh matlab dost

ye mehmāñ-dārī to mahaz ik zarī'ā hai

kām-ravā.ī hai terā maqsad ai dost

ye shaffāf bilaurī paimāne aur kanTar

merī nazroñ meñ in kī qīmat kuchh bhī nahīñ

mujh ko raas aa.e miTTī kā piyāla dost

mere liye jām-e-jam kī 'azmat kuchh bhī nahīñ

merā dam ghuTtā hai is bazm-e-tarab meñ

mujh ko jaane de tū takrār na kar ai dost

maslahat-āmez mudārāt mujhe raas nahīñ

merī shirkat pe isrār na kar ai dost

mujh ko daulat ki khanak na suna ai dost

mere kanon ko is aawaz se nafrat hai

rah-rah ke khaTakti hai aankhon mein meri

ye jo teri numaish-e-mal-o-hashmat hai

hai KHub teri KHatir-dari aur tawazo'

mai-e-gulfam ke jam chhalakte hain har-su

'itr-agin hai sara mahaul magar dost

aae na kahin se bhi kuchh iKHlas ki bu

jam uThata hun to kanp uThte hain hath

ho koi lahu se labrez piyala jaise

lazzat-amez kabab utren na halaq se

bhuke munh se chhin liya ho niwala jaise

ye mu'azzaz mehman ye masnu'i muskanen

har mad'u se hai tujhe kuchh matlab dost

ye mehman-dari to mahaz ek zari'a hai

kaam-rawai hai tera maqsad ai dost

ye shaffaf bilauri paimane aur kanTar

meri nazron mein in ki qimat kuchh bhi nahin

mujh ko ras aae miTTi ka piyala dost

mere liye jam-e-jam ki 'azmat kuchh bhi nahin

mera dam ghuTta hai is bazm-e-tarab mein

mujh ko jaane de tu takrar na kar ai dost

maslahat-amez mudaraat mujhe ras nahin

meri shirkat pe israr na kar ai dost