daldal

kasmasātī huī

reñgtī

aur bal khaa.e

baḌhtī huī

koī daldal

lapeTe hue hai

merī gardan pe bāloñ pe

kīchaḌ ke chhīñTe

mire muñh meñ

na saaf paanī kā gadlā kasīlā maza hai

haath TuuTe hue chappuoñ kī tarah

merī nazroñ meñ haiñ

nuqra.ī āsmāñ

aur kirnoñ ke jharne

ḳhalāoñ meñ uljhe hue chāñd taare

daraḳhtoñ ke maġhrūr qad

aur bebāk baazū

subuk jism

sākit pahāḌoñ kī bahtī huī symphony

aur maujoñ kā āhang

lamhoñ kī uryāniyāñ

dāv’at-e-sang

zarroñ ke mub.ham ishāre

muntazir ik jahāñ

lekin is

gāḌhī daldal ke dariyā meñ

hai kaun rahvār merā

yahāñ kaun ham-rāz hai

mere dāmānda lāġhar badan ke sivā

ek TuuTā safīna

phaTe bādbāñ

kasmasati hui

rengti

aur bal khae

baDhti hui

koi daldal

lapeTe hue hai

meri gardan pe baalon pe

kichaD ke chhinTe

mere munh mein

na saf pani ka gadla kasila maza hai

hath TuTe hue chappuon ki tarah

meri nazron mein hain

nuqrai aasman

aur kirnon ke jharne

KHalaon mein uljhe hue chand tare

daraKHton ke maghrur qad

aur bebak bazu

subuk jism

sakit pahaDon ki bahti hui symphony

aur maujon ka aahang

lamhon ki uryaniyan

daw’at-e-sang

zarron ke mubham ishaare

muntazir ek jahan

lekin is

gaDhi daldal ke dariya mein

hai kaun rahwar mera

yahan kaun ham-raaz hai

mere damanda laghar badan ke siwa

ek TuTa safina

phaTe baadban