dam toDti hui sansen

aTuuT rishtoñ ke

saare bandhan

shikasta sochoñ ke dā.eroñ meñ

simaT ga.e haiñ

ham apnī rah se bhī haT ga.e haiñ

sukūn-e-qalb-o-nazar kī ḳhātir

ham apnī apnī masāfatoñ kī

talāsh meñ haiñ

magar ye shahr-e-anā jo ham ko

aziyyateñ-dar-aziyyateñ de

qarār chhīne sukūn luuTe

hamesha nafrat kī āriyoñ se

hamārī shah-rag ko kāTtā hai

hamāre sīnoñ meñ zaḳhm bo.e ga.e haiñ itne

ki jin kī shiddat se kaañp uTThā

vajūd saarā

ham itne ghaav chhupā.e dil meñ

na jaane kaise

dukhoñ se apne

badan ko Dhāñpe

azaab mausam meñ

jī rahe haiñ

aTuT rishton ke

sare bandhan

shikasta sochon ke daeron mein

simaT gae hain

hum apni rah se bhi haT gae hain

sukun-e-qalb-o-nazar ki KHatir

hum apni apni masafaton ki

talash mein hain

magar ye shahr-e-ana jo hum ko

aziyyaten-dar-aziyyaten de

qarar chhine sukun luTe

hamesha nafrat ki aariyon se

hamari shah-rag ko kaTta hai

hamare sinon mein zaKHm boe gae hain itne

ki jin ki shiddat se kanp uTTha

wajud sara

hum itne ghaw chhupae dil mein

na jaane kaise

dukhon se apne

badan ko Dhanpe

azab mausam mein

ji rahe hain