dar band kar diya

ġhurūb hote sūraj kī

sunahrī kirneñ

yuuñ lagā ke mahv-e-kalām haiñ

savāl kar rahī haiñ

bhulā sakogī

lahjoñ ke tamām nashtar

dhoke meñ lipTī huī mohabbateñ

munāfiqat kā labāda oḌhe

fareb ke vo tamām ḳhanjar

jo dil kī shaffāf taḳhtī

reza-reza kar chuke haiñ

kahāñ pe darj hai

ki mahv huuñ

shān-e-nasab ke sadqe

izzatoñ kī dastār

merī peshānī ko raushan rakhe hue hai

bāġh-e-ulfat kī

hasīñ vaadī meñ

merī pasand ke phuul khile haiñ

maiñ bhuul chukī huuñ

uljhanoñ ke tamām silsile

sāzishoñ ke bichhā.e jaal

vo saare raste

jo terī jānib nikalte the

nihāyat sahl thā

kuchh bhī dushvār hargiz nahīñ thā

faqat ik qahqaha lagāyā

terī jānib jo khultā thā

vo dar band kar diyā

ghurub hote suraj ki

sunahri kirnen

yun laga ke mahw-e-kalam hain

sawal kar rahi hain

bhula sakogi

lahjon ke tamam nashtar

dhoke mein lipTi hui mohabbaten

munafiqat ka labaada oDhe

fareb ke wo tamam KHanjar

jo dil ki shaffaf taKHti

reza-reza kar chuke hain

kahan pe darj hai

ki mahw hun

shan-e-nasab ke sadqe

izzaton ki dastar

meri peshani ko raushan rakhe hue hai

bagh-e-ulfat ki

hasin wadi mein

meri pasand ke phul khile hain

main bhul chuki hun

uljhanon ke tamam silsile

sazishon ke bichhae jal

wo sare raste

jo teri jaanib nikalte the

nihayat sahl tha

kuchh bhi dushwar hargiz nahin tha

faqat ek qahqaha lagaya

teri jaanib jo khulta tha

wo dar band kar diya