dar-e-umid ke daryuza-gar

phir phurere ban ke mere tan-badan kī dhajjiyāñ

shahr ke dīvār-o-dar ko rañg pahnāne lagīñ

phir kaf-ālūda zabāneñ mad.h o zam kī qumchiyāñ

mere zehn o gosh ke zaḳhmoñ pe barsāne lagīñ

phir nikal aa.e havasnākoñ ke raqsāñ tā.ife

dardmañd-e-ishq par ThaTThe lagāne ke liye

phir duhal karne lage tashhīr-e-iḳhlās-o-vafā

kushta-e-sidq-o-safā kā dil jalāne ke liye

ham ki haiñ kab se dar-e-ummīd ke daryūza-gar

ye ghaḌī guzrī to phir dast-e-talab phailā.eñge

kūcha o bāzār se phir chun ke reza reza ḳhvāb

ham yūñhī pahle kī sūrat joḌne lag jā.eñge

phir phurere ban ke mere tan-badan ki dhajjiyan

shahr ke diwar-o-dar ko rang pahnane lagin

phir kaf-aluda zabanen madh o zam ki qumchiyan

mere zehn o gosh ke zaKHmon pe barsane lagin

phir nikal aae hawasnakon ke raqsan taife

dardmand-e-ishq par ThaTThe lagane ke liye

phir duhal karne lage tashhir-e-iKHlas-o-wafa

kushta-e-sidq-o-safa ka dil jalane ke liye

hum ki hain kab se dar-e-ummid ke daryuza-gar

ye ghaDi guzri to phir dast-e-talab phailaenge

kucha o bazar se phir chun ke reza reza KHwab

hum yunhi pahle ki surat joDne lag jaenge