Dar lagta hai

chaurāhe par board lagā hai

beTī bachāo beTī paḌhāo

lekin Thiik usī ke aage

chand darinde khaḌe hue haiñ

aatī jaatī har titlī ke par ko takte

rang se ḳhā.if

chāhte haiñ ki har titlī ke par ko nocheñ

rang uḌā deñ

shāyad un ko 'ilm nahīñ ki

rang ye saare

maañ aur baap kī barsoñ kī mehnat kā samra

barsoñ kī kāvish kā natīja hote haiñ

lekin ye ehsās hī kab hai darindoñ ko

kaise maañ aur baap ne rang chune haiñ saare

naqsh banā.e

aur ‘ilm-o-dānish kī rāhoñ par chhoḌā hai

apnī chanchal aur matvālī titlī ko

par phailāne

taaki un ke rang tamām nikharte jaa.eñ

phir bhī aksar Dar lagtā hai

ye ‘ilm-o-dānish ke raste

kis darja pur-ḳhauf-o-ḳhatar haiñ

har lamha luTne kā Dar hai

hālāñki chaurāhe par haiñ chand muhāfiz

nazar jamā.e

half uThā.e

dhaak biThā.e

lekin phir bhī Dar lagtā hai

shaam Dhale chaurāhe ke ye chand muhāfiz

merī chanchal titlī ke ye kaTe phaTe par

uḌe hue rang

mere darvāze ke aage Daal na jaa.eñ

chaurahe par board laga hai

beTi bachao beTi paDhao

lekin Thik usi ke aage

chand darinde khaDe hue hain

aati jati har titli ke par ko takte

rang se KHaif

chahte hain ki har titli ke par ko nochen

rang uDa den

shayad un ko 'ilm nahin ki

rang ye sare

man aur bap ki barson ki mehnat ka samra

barson ki kawish ka natija hote hain

lekin ye ehsas hi kab hai darindon ko

kaise man aur bap ne rang chune hain sare

naqsh banae

aur ‘ilm-o-danish ki rahon par chhoDa hai

apni chanchal aur matwali titli ko

par phailane

taki un ke rang tamam nikharte jaen

phir bhi aksar Dar lagta hai

ye ‘ilm-o-danish ke raste

kis darja pur-KHauf-o-KHatar hain

har lamha luTne ka Dar hai

haalanki chaurahe par hain chand muhafiz

nazar jamae

half uThae

dhak biThae

lekin phir bhi Dar lagta hai

sham Dhale chaurahe ke ye chand muhafiz

meri chanchal titli ke ye kaTe phaTe par

uDe hue rang

mere darwaze ke aage Dal na jaen