ڈر

پھٹی پھٹی سی نگاہوں سے تک رہے تھے سبھی

نسیں تنی تھیں رگ جاں پھڑک رہی تھی

اچانک دلوں کی دھڑکنیں

سر میں دھمکنے لگتی تھیں

قطب نما نہ کوئی باد نما اور نہ مرغ باد نما

ہوائیں آندھیاں طوفان برف و باراں

تمام اہل صفت اشک شوئی کرتے رہے

وہ عارفانہ تجاہل

دعائے خیر

خودکشی تھی کہ دانستہ اختناق اب کسے معلوم

بتا رہا ہے مگر آج کا آثار فروش

سبھی کو خوف تھا افشائے راز کا ورنہ

اندھیرا دھل جاتا

پکارتا کوئی سم سم

تو در بھی کھل جاتا