Dar

ye Dar jo saath chaltā hai

mirī maañ kī amānat hai

maiñ jab chhoTī sī bachchī thī

to merī maañ ne

is Dar ko mire dil ke

kisī sunsān goshe meñ

baḌī mushkil se Daalā thā

vo kahtī thī

ki maiñ tanhā kahīñ bāhar na jā.ūñ

kyuuñ na jā.ūñ

bahs kartī maiñ

vahāñ par bheḌiye phirte haiñ

insānoñ kī sūrat meñ

maiñ us kī baat sun kar

dil meñ hans paḌtī

vo kahtī thī

dupaTTa sar pe luuñ

apnī nigāheñ nīchī rakkhūñ

aur

har ik hukm par sar ko jhukā.ūñ

aur maiñ kahtī

sarāsar buzdilī hai ye

vo kahtī

haañ to buzdil laḌkiyāñ hī shaad rahtī haiñ

sadā ābād rahtī haiñ

hamesha shaad rahnā thā

sadā ābād rahnā thā

so maiñ ne apnī maañ kī is amānat ko

sadā āñchal se apne bāñdh kar rakkhā

ye Dar jo sath chalta hai

meri man ki amanat hai

main jab chhoTi si bachchi thi

to meri man ne

is Dar ko mere dil ke

kisi sunsan goshe mein

baDi mushkil se Dala tha

wo kahti thi

ki main tanha kahin bahar na jaun

kyun na jaun

bahs karti main

wahan par bheDiye phirte hain

insanon ki surat mein

main us ki baat sun kar

dil mein hans paDti

wo kahti thi

dupaTTa sar pe lun

apni nigahen nichi rakkhun

aur

har ek hukm par sar ko jhukaun

aur main kahti

sarasar buzdili hai ye

wo kahti

han to buzdil laDkiyan hi shad rahti hain

sada aabaad rahti hain

hamesha shad rahna tha

sada aabaad rahna tha

so main ne apni man ki is amanat ko

sada aanchal se apne bandh kar rakkha