daraKHt-e-zard

nahīñ ma.alūm 'zaryūn' ab tumhārī umr kyā hogī

vo kin ḳhvāboñ se jaane āshnā nā-āshnā hogī

tumhāre dil ke is duniyā se kaise silsile hoñge

tumheñ kaise gumāñ hoñge tumheñ kaise gile hoñge

tumhārī sub.h jaane kin ḳhayāloñ se nahātī ho

tumhārī shaam jaane kin malāloñ se nibhātī ho

na jaane kaun doshīza tumhārī zindagī hogī

na jaane us kī kyā bāyastagī shā.istagī hogī

use tum phone karte aur ḳhat likhte rahe hoge

na jaane tum ne kitnī kam ġhalat urdu likhī hogī

ye ḳhat likhnā to daqyānūs kī pīḌhī kā qissa hai

ye sinf-e-nasr ham nā-bāliġhoñ ke fan kā hissa hai

vo hañstī ho to shāyad tum na rah paate ho hāloñ meñ

gaḌhā nanhā sā paḌ jaatā ho shāyad us ke gāloñ meñ

gumāñ ye hai tumhārī bhī rasā.ī nā-rasā.ī ho

vo aa.ī ho tumhāre paas lekin aa na paa.ī ho

vo shāyad mā.ide kī gand biryānī na khātī ho

vo nān-e-be-ḳhamīr-e-maida kam-tar hī chabātī ho

vo doshīza bhī shāyad dāstānoñ kī ho dil-dāda

use ma.alūm hogā 'zāl' thā 'sohrāb' kā daadā

tahamtan ya.anī 'rustam' thā girāmī 'sām' kā vāris

girāmī 'sām' thā sulb-e-nar-e-'mānī' kā ḳhush-zāda

(ye merī ek ḳhvāhish hai jo mushkil hai)

vo 'najm'-āfañdi-e-marhūm ko to jāntī hogī

vo nauhoñ ke adab kā tarz to pahchāntī hogī

use kad hogī shāyad un sabhī se jo lapāḌī hoñ

na hoñge ḳhvāb us kā jo gavayye aur khilāḌī hoñ

hadaf hoñge tumhārā kaun tum kis ke hadaf hoge

na jaane vaqt kī paikār meñ tum kis taraf hoge

hai ran ye zindagī ik ran jo barpā lamha lamha hai

hameñ is ran meñ kuchh bhī ho kisī jānib to honā hai

so ham bhī is nafas tak haiñ sipāhī ek lashkar ke

hazāroñ saal se jiite chale aa.e haiñ mar mar ke

shuhūd ik fan hai aur merī adāvat be-fanoñ se hai

mirī paikār azal se

ye 'ḳhusro' 'mīr' 'ġhālib' kā ḳharāba bechtā kyā hai

hamārā 'ġhālib'-e-āzam thā chor āqa-e-'bedil' kā

so rizq-e-faḳhr ab ham khā rahe haiñ 'mīr'-e-bismil kā

sidhārat bhī thā sharminda ki do-ābe kā baasī thā

tumheñ ma.alūm hai urdu jo hai paalī se niklī hai

vo goyā us kī hī ik pur-numū Daalī se niklī hai

ye kaḌvāhaT kī bāteñ haiñ miThās in kī na pūchho tum

nam-e-lab ko tarastī haiñ so pyaas in kī na pūchho tum

ye ik do jur.oñ kī ik chuhl hai aur chuhl meñ kyā hai

avāmunnās se pūchho bhalā al-kuhl meñ kyā hai

ye ta.an-o-tanz kī harza-sarā.ī ho nahīñ saktī

ki merī jaan mere dil se rishta kho nahīñ saktī

nasha chaḌhne lagā hai aur chaḌhnā chāhiye bhī thā

abas kā nirḳh to is vaqt baḌhnā chāhiye bhī thā

ajab be-mājrā be-taur be-zārāna hālat hai

vajūd ik vahm hai aur vahm hī shāyad haqīqat hai

ġharaz jo haal thā vo nafs ke bāzār hī kā thā

hai ''ze'' bāzār meñ to darmiyāñ 'zaryūn' meñ avval

to ye ibrāfanīqī khelte harfoñ se the har pal

to ye 'zaryūn' jo hai kyā ye aflātūn hai koī

amaañ 'zaryūn' hai 'zaryūn' vo ma.ajūn kyuuñ hotā

haiñ ma.ajūneñ mufīd ''arvāh'' ko ma.ajūn yuuñ hotā

suno tafrīq kaise ho bhalā ashḳhās o ashyā meñ

bahut janjāl haiñ par ho yahāñ to ''yā'' meñ aur ''yā'' meñ

tumhārī jo hamāsa hai bhalā us kā to kyā kahnā

hai shāyad mujh ko saarī umr us ke sehr meñ rahnā

magar mere ġharīb ajdād ne bhī kuchh kiyā hogā

bahut tuchchā sahī un kā bhī koī mājrā hogā

ye ham jo haiñ hamārī bhī to hogī koī nauTañkī

hamārā ḳhuun bhī sach-much kā sehne par bahā hogā

hai āḳhir zindagī ḳhuun az-bun-e-nāḳhun bar-āvar-tar

qayāmat sāneha matlab qayāmat fāje.a parvar

nahīñ ho tum mire aur merā fardā bhī nahīñ merā

so maiñ ne sāhat-e-dīroz meñ Daalā hai ab Derā

mire dīroz meñ zahr-e-halāhal teġh-e-qātil hai

mire ghar kā vahī sarnām-tar hai jo bhī bismil hai

guzasht-e-vaqt se paimān hai apnā ajab sā kuchh

so ik ma.amūl hai imrān ke ghar kā ajab sā kuchh

'hasan' naamī hamāre ghar meñ ik 'suqrāt' guzrā hai

vo apnī naf.i se isbāt tak ma.ashar ke pahuñchā hai

ki ḳhūn-e-rā.egāñ ke amr meñ paḌnā nahīñ ham ko

vo sūd-e-hāl se yaksar ziyāñ-kārāna guzrā hai

talab thī ḳhuun kī qai kī use aur be-nihāyat thī

so fauran bint-e-ash.ash kā pilāyā pī gayā hogā

vo ik lamhe ke andar sarmadiyyat jī gayā hogā

tumhārī arjumand ammī ko maiñ bhūlā bahut din meñ

maiñ un kī rañg kī taskīn se nimTā bahut din meñ

vahī to haiñ jinhoñ ne mujh ko paiham rañg thukvāyā

vo kis rag kā lahū hai jo miyāñ maiñ ne nahīñ thūkā

lahū aur thūknā us kā hai kārobār bhī merā

yahī hai saakh bhī merī yahī me.aar bhī merā

maiñ vo huuñ jis ne apne ḳhuun se mausam khilā.e haiñ

na-jāne vaqt ke kitne hī aalam āzmā.e haiñ

maiñ ik tārīḳh huuñ aur merī jaane kitnī fasleñ haiñ

mirī kitnī hī fareñ haiñ mirī kitnī hī asleñ haiñ

havādis mājrā hī ham rahe haiñ ik zamāne se

shadā.ed sāneha hī ham rahe haiñ ik zamāne se

hamesha se bapā ik jañg hai ham us meñ qaa.em haiñ

hamārī jañg ḳhair o shar ke bistar kī hai zā.ida

ye charḳh-e-jabr ke davvār-e-mumkin kī hai girvīda

laḌā.ī ke liye maidān aur lashkar nahīñ lāzim

sinān o gurz o shamshīr o tabar ḳhanjar nahīñ lāzim

bas ik ehsās lāzim hai ki ham buadain haiñ donoñ

ki nafi-e-ain-e-ain o sar-ba-sar ziddain haiñ donoñ

luis-urbina ne merī ajab kuchh ġham-gusārī kī

ba-sad dil dānishī guzrān apnī mujh pe taarī kī

bahut us ne pilā.ī aur piine hī na dī mujh ko

palak tak us ne marne ke liye jiine na dī mujh ko

''maiñ tere ishq meñ ranjīda huuñ haañ ab bhī kuchh kuchh huuñ

mujhe terī ḳhayānat ne ġhazab majrūh kar Daalā

magar taish-e-shadīdāna ke ba.ad āḳhir zamāne meñ

razā kī jāvidāna jabr kī naubat bhī aa pahuñchī''

mohabbat ek paspā.ī hai pur-ahvāl hālat kī

mohabbat apnī yak-taurī meñ dushman hai mohabbat kī

suḳhan māl-e-mohabbat kī dukān-ārā.ī kartā hai

suḳhan sau tarah se ik ramz kī rusvā.ī kartā hai

suḳhan bakvās hai bakvās jo Thahrā hai fan merā

vo hai ta.abīr kā aflās jo Thahrā hai fan merā

suḳhan ya.anī laboñ kā fan suḳhan-var ya.anī ik pur-fan

suḳhan-var iizad achchhā thā ki aadam yā phir ahriman

mazīd aañkī suḳhan meñ vaqt hai vaqt ab se ab ya.anī

kuchh aisā hai ye maiñ jo huuñ ye maiñ apne sivā huuñ ''maiñ''

so apne aap meñ shāyad nahīñ vaaq.e huā huuñ maiñ

jo hone meñ ho vo har lamha apnā ġhair hotā hai

ki hone ko to hone se ajab kuchh bair hotā hai

yūñhī bas yūñhī 'zenū' ne yakāyak ḳhud-kushī kar lī

ajab hiss-e-zarāfat ke the mālik ye ravāqī bhī

bidah yaarā azaañ baada ki dahqāñ parvard āñ-rā

ba sozad har mata-e-intimā.e dūdmānañ rā

ba-sozad iiñ zamīn-e-e'tibār-o-āsmānāñ rā

ba-sozad jaan o dil rāham bayāsāyad dil o jaañ rā

dil o jaañ aur āsā.ish ye ik kaunī tamasḳhur hai

humuq kī abqariyyat hai safāhat kā tafakkur hai

humuq kī abqariyyat aur safāhat ke tafakkur ne

hameñ taz.ī-e-mohlat ke liye akvān baḳhshe haiñ

aur aflātūn-e-aqdas ne hameñ āyān baḳhshe haiñ

suno 'zaryūn' tum to ain-e-a.ayān-e-haqīqat ho

nazar se duur manzar kā sar-o-sāmān-e-sarvat ho

hamārī umr kā qissa hisāb andoz-e-ānī hai

zamānī zad meñ zan kī ik gumān-e-lāzimānī hai

gumāñ ye hai ki baaqī hai baqā har aan faanī hai

kahānī sunñe vaale jo bhī haiñ vo ḳhud kahānī haiñ

kahānī kahne vaalā ik kahānī kī kahānī hai

piyā pe ye gudāzish ye gumāñ aur ye gile kaise

sila-sozī to merā fan hai phir is ke sile kaise

to maiñ kyā kah rahā thā ya.anī kyā kuchh sah rahā thā maiñ

amaañ haañ mez par yā mez par se bah rahā thā maiñ

ruko maiñ be-sar-o-pā apne sar se bhaag niklā huuñ

ilā yā ayyuhal-abjad zarā ya.anī zarā Thahro

There is an absurd i in absurdity shāyad

kahīñ apne sivā ya.anī kahīñ apne sivā Thahro

tum is absurdity meñ ik radīf ik qāfiya Thahro

radīf o qāfiya kyā haiñ shikast-e-nā-ravā kyā hai

shikast-e-nāravā ne mujh ko paara paara kar Daalā

anā ko merī be-andāza-tar be-chāra kar Daalā

maiñ apne aap meñ haarā huuñ aur ḳhvārāna haarā huuñ

jigar-chākāna haarā huuñ dil-afgārāna haarā huuñ

jise fan kahte aa.e haiñ vo hai ḳhūn-e-jigar apnā

magar ḳhūn-e-jigar kyā hai vo hai kattāl-tar apnā

koī ḳhūn-e-jigar kā fan zarā ta.abīr meñ laa.e

magar maiñ to kahūñ vo pahle mere sāmne aa.e

vajūd o sher ye donoñ define ho nahīñ sakte

kabhī mafhūm meñ hargiz ye kaa.in ho nahīñ sakte

hisāb-e-harf meñ aatā rahā hai bas hasab un kā

nahīñ ma.alūm iizad īzdāñ ko bhī nasab un kā

hai iizad īzdāñ ik ramz jo be-ramz nisbat hai

miyāñ ik haal hai ik haal jo be-hāl-e-hālat hai

na jaane jabr hai hālat ki hālat jabr hai ya.anī

kisī bhī baat ke ma.anī jo haiñ un ke haiñ kyā ma.anī

vajūd ik jabr hai merā adam auqāt hai merī

jo merī zaat hargiz bhī nahīñ vo zaat hai merī

maiñ roz-o-shab nigārish-kosh ḳhud apne adam kā huuñ

maiñ apnā aadmī hargiz nahīñ lauh-o-qalam kā huuñ

haiñ kaḌvāhaT meñ ye bhīge hue lamhe ajab se kuchh

sarāsar be-hisābānā sarāsar be-sabab se kuchh

sarāboñ ne sarāboñ par bahut bādal haiñ barsā.e

sharāboñ ne ma.ābad ke tamūz o ba.al nahlā.e

(yaqīnan qāfiya hai yāvā-farmā.ī kā sar-chashma

''haiñ nahlā.e'' ''haiñ barsā.e'')

na jaane āriba kyuuñ aa.e kyuuñ musta.araba aa.e

muzir ke log to chhāne hī vaale the so vo chhā.e

mire jad hāshim-e-ālī ga.e gazza meñ dafnā.e

maiñ naaqe ko pilā.ūñgā mujhe vaañ tak vo le jaa.e

lidū lilmauti vabnū lilhizābi san ḳharābātī

vo mard-e-ūs kahtā hai haqīqat hai ḳhurāfātī

ye zālim tīsrā paig ik aqānīmī bidāyat hai

ulūhī harzā-farmā.ī kā sirr-e-tūr-e-luknat hai

bhalā hūrab kī jhāḌī kā vo ramz-e-ātishīñ kyā thā

magar hūrab kī jhāḌī kyā ye kis se kis kī nisbat hai

ye nisbat ke bahut se qāfiye haiñ hai gilā is kā

magar tujh ko to yārā! qāfiyoñ kī be-tarah lat hai

gumāñ ye hai ki shāyad bahr se ḳhārij nahīñ huuñ maiñ

zarā bhī haal ke āhañg meñ hārij nahīñ huuñ

tanā-tan tan tanā-tan tan tanā-tan tan tanā-tan tan

tanā-tan tan nahīñ mehnat-kashoñ kā tan na pairāhan

na pairāhan na puurī aadhī roTī ab rahā sālan

ye saale kuchh bhī khāne ko na paa.eñ gāliyāñ khā.eñ

hai in kī be-hisī meñ to muqaddas-tar harāmī-pan

magar āhañg merā kho gayā shāyad kahāñ jaane

koī mauj-e-... koī mauj-e-shumāl-e-jāvedāñ jaane

shumāl-e-jāvedāñ ke apne hī qisse the jo guzre

vo ho guzre to phir ḳhud maiñ ne bhī jaanā vo ho guzre

shumāl-e-jāvedāñ apnā shumāl-e-jāvedān-e-jāñ

hai ab bhī apnī pūñjī ik malāl-e-jāvedān-e-jāñ

nahīñ ma.alūm 'zayūn' ab tumhārī umr kyā hogī

yahī hai dil kā mazmūn ab tumhārī umr kyā hogī

hamāre darmiyāñ ab ek bejā-tar zamāna hai

lab-e-tishna pe ik zahr-e-haqīqat kā fasāna hai

ajab fursat mayassar aa.ī hai ''dil jaan rishte'' ko

na dil ko āzmānā hai na jaañ ko āzmānā hai

kalīd-e-kisht-zār-e-ḳhvāb bhī gum ho ga.ī āḳhir

kahāñ ab jāda-e-ḳhurram meñ sar-sabzāna jaanā hai

kahūñ to kyā kahūñ merā ye zaḳhm-e-jāvedāna hai

vahī dil kī haqīqat jo kabhī jaañ thī vo ab āḳhir

fasāna dar fasāna dar fasāna dar fasāna hai

hamārā bāhamī rishta jo hāsil-tar thā rishtoñ kā

hamārā taur-e-be-zārī bhī kitnā vālihāna hai

kisī kā naam likkhā hai mirī saarī bayāzoñ par

maiñ himmat kar rahā huuñ ya.anī ab us ko miTānā hai

ye ik shām-e-azāb-e-be-sarokāna hālat hai

hue jaane kī hālat meñ huuñ bas fursat hī fursat hai

nahīñ ma.alūm tum is vaqt kis ma.alūm meñ hoge

na jaane kaun se ma.anī meñ kis mafhūm meñ hoge

maiñ thā mafhūm nā-mafhūm meñ gum ho chukā huuñ maiñ

maiñ thā ma.alūm nā-mālūm meñ gum ho chukā huuñ maiñ

nahīñ ma.alūm 'zaryūn' ab tumhārī umr kyā hogī

mire ḳhud se guzarne ke zamāne se sivā hogī

mire qāmat se ab qāmat tumhārā kuchh fuzūñ hogā

mirā fardā mire dīroz se bhī ḳhush numūñ hogā

hisāb-e-māh-o-sāl ab tak kabhī rakkhā nahīñ maiñ ne

kisī bhī fasl kā ab tak maza chakkhā nahīñ maiñ ne

maiñ apne aap meñ kab rah sakā kab rah sakā āḳhir

kabhī ik pal ko bhī apne liye sochā nahīñ maiñ ne

hisāb-e-māh-o-sāl o roz-o-shab vo soḳhta-būdash

musalsal jāñ-kanī ke haal meñ rakhtā bhī to kaise

jise ye bhī na ho ma.alūm vo hai bhī to kyūñ-kar hai

koī hālat dil-e-pāmāl meñ rakhtā bhī to kaise

koī nisbat bhī ab to zaat se bāhar nahīñ merī

koī bistar nahīñ merā koī chādar nahīñ merī

ba-hāl-e-nā-shitā sad-zaḳhm-hā o ḳhūn-hā ḳhūdam

ba-har-dam shukarāñ āmeḳhta ma.ajūn-hā ḳhūdam

tumheñ is baat se matlab hī kyā aur āḳhirash kyuuñ ho

kisī se bhī nahīñ mujh ko gila aur āḳhirash kyuuñ ho

jo hai ik nañg-e-hastī us ko tum kyā jaan bhī loge

agar tum dekh lo mujh ko to kyā pahchān bhī loge

tumheñ mujh se jo nafrat hai vahī to merī rāhat hai

mirī jo bhī aziyyat hai vahī to merī lazzat hai

ki āḳhir is jahāñ kā ek nizām-e-kār hai āḳhir

jazā kā aur sazā kā koī to hanjār hai āḳhir

maiñ ḳhud meñ jheñktā huuñ aur siine meñ bhaḌaktā huuñ

mire andar jo hai ik shaḳhs maiñ us meñ phaḌaktā huuñ

hai merī zindagī ab roz-o-shab yak-majlis-e-ġham-hā

azā-hā marsiya-hā girya-hā āshob-e-mātam-hā

tumhārī tarbiyat meñ merā hissa kam rahā kam-tar

zabāñ merī tumhāre vāste shāyad ki mushkil ho

zabāñ apnī zabāñ maiñ tum ko āḳhir kab sikhā paayā

azāb-e-sad-shamātat āḳhirash mujh par hī nāzil ho

zabāñ kā kaam yuuñ bhī baat samjhānā nahīñ hotā

samajh meñ koī bhī matlab kabhī aanā nahīñ hotā

kabhī ḳhud tak bhī matlab koī pahuñchānā nahīñ hotā

gumānoñ ke gumāñ kī dam-ba-dam āshob-kārī hai

bhalā kyā e'tibārī aur kyā nā-e'tibārī hai

gumāñ ye hai bhalā meñ juz gumāñ kyā thā gumānoñ meñ

suḳhan hī kyā fasānoñ kā dharā kyā hai fasānoñ meñ

mirā kyā tazkira aur vāqa.ī kyā tazkira merā

maiñ ik afsos thā afsos huuñ guzre zamānoñ meñ

hai shāyad dil mirā be-zaḳhm aur lab par nahīñ chhāle

mire siine meñ kab sozinda-tar dāġhoñ ke haiñ thāle

magar dozaḳh pighal jaa.e jo mere saañs apnā le

tum apnī maam ke behad murādī minnatoñ vaale

mire kuchh bhī nahīñ kuchh bhī nahīñ kuchh bhī nahīñ baale

magar pahle kabhī tum se mirā kuchh silsila to thā

gumāñ meñ mere shāyad ik koī ġhuncha khilā to thā

vo merī jāvedāna be-duī kā ik sila to thā

so us ko ek abbū naam kā ghoḌā milā to thā

sāya-e-dāmān-e-rahmat chāhiye thoḌā mujhe

maiñ na chhoḌūñ yā nabī tum ne agar chhoḌā mujhe

iid ke din mustafā se yuuñ lage kahne 'husain'

sabz joḌā do 'hasan' ko surḳh do joḌā mujhe

''adab adab kutte tire kaan kāTūñ

'zaryūn' ke byaah ke naan bāTūñ''

tāroñ bhare jagar jagar ḳhvān bāTūñ

''ā jā rī nindiyā tū aa kyuuñ na jā

'zaryūn' ko aa ke sulā kyuuñ na jaa''

tumhāre byaah meñ shajara paḌhā jaanā thā nausha vāstī dūlhā

''chaukī āñgan meñ bichhī vāstī dūlhā ke liye''

makke madīne ke paak musalle payambar ghar navāse

shāh-e-mardāñ amīrul-maminīn hazrat-'alī' ke pote

hazrat imām-'hasan' hazrat imām-'husain' ke pote

hazrat imām-alī-'naqī' ke pote

sayyad-'jāfar' saanī ke pote

sayyad abul-farah saidvāil-vāstī ke pote

mīrāñ sayyad-'alī'-buzurg ke pote

sayyad-'husain'-sharfuddīn shāh-vilāyat ke pote

qaazī sayyad-'amīr'-alī ke pote

dīvān sayyad-'hāmid' ke pote

allāma sayyad-shafīq-'hasan'-eliyā ke pote

sayyad-'jaun'-eliyā hasani-ul-husainī sapūt-jāh''

magar nāzir hamārā soḳhta-sulb āḳhirī nassāb ab marne hī vaalā hai

bas ik pal haf sadī kā faisla karne hī vaalā hai

suno 'zaryūn' bas tum hī suno ya.anī faqat tum hī

vahī rāhat meñ hai jo aam se hone ko apnā le

kabhī koī bhī par ho koī 'bahman' yaar yā 'zenū'

tumheñ bahkā na paa.e aur bairūnī na kar Daale

maiñ saarī zindagī ke dukh bhugat kar tum se kahtā huuñ

bahut dukh degī tum meñ fikr aur fan kī numū mujh ko

tumhāre vāste behad sahūlat chāhtā huuñ maiñ

davām-e-jahl o hāl-e-istirāhat chāhtā huuñ maiñ

na dekho kaash tum vo ḳhvāb jo dekhā kiyā huuñ maiñ

vo saare ḳhvāb the qassāb jo dekhā kiyā huuñ maiñ

ḳharāsh-e-dil se tum be-rishta be-maqdūr hī Thahro

mire jahmīm-e-zāt-e-zāt se tum duur hī Thahro

koī 'zaryūn' koī bhī clerk aur koī kārinda

koī bhī bank kā afsar senator koī pāvanda

har ik haivān-e-sarkārī ko TaTTū jāntā huuñ maiñ

so zāhir hai ise shai se ziyāda māntā huuñ maiñ

tumheñ ho sub.h-dam taufīq bas aḳhbār paḌhne kī

tumheñ ai kaash bīmārī na ho dīvār paḌhne kī

ajab hai 'sartre' aur 'ressel' bhī aḳhbār paḌhte the

vo mālūmāt ke maidān ke shauqīn būḌhe the

nahīñ ma.alūm mujh ko aam shahrī kaise hote haiñ

vo kaise apnā banjar naam banjar-pan meñ bote haiñ

maiñ ''urr'' se aaj tak ik aam shahrī ho nahīñ paayā

isī baa.is maiñ huuñ amboh kī lazzat se be-māya

magar tum ik do-pāya raast qāmat ho ke dikhlānā

suno rā.e-dahinda bin hue tum baaz mat aanā

faqat 'zaryūn' ho tum ya.anī apnā sābiqā chhoḌo

faqat 'zaryūn' ho tum ya.anī apnā lāhiqā chhoḌo

magar maiñ kaun jo chāhūñ tumhāre baab meñ kuchh bhī

bhalā kyuuñ ho mire ehsās ke asbāb meñ kuchh bhī

tumhārā baap ya.anī maiñ abas maiñ ik abas-tar maiñ

magar maiñ ya.anī jaane kaun achchhā maiñ sarāsar maiñ

maiñ kāsa-bāz o kīna-sāz o kāsa-tan huuñ kuttā huuñ

maiñ ik nañgīn-e-būdash huuñ pa tum to sirr-e-mun.am ho

tumhārā baap rūhul-quds thā tum ibn-e-maryam ho

ye qulqul tīsrā paig ab to chauthā ho gumāñ ye hai

gumāñ kā mujh se koī ḳhaas rishta ho gumāñ ye hai

gumāñ ye hai ki maiñ jo jā rahā thā aa rahā huuñ maiñ

magar maiñ aa rahā kab huuñ piyāpe jā rahā huuñ maiñ

ye chauthā paig hai ūñ-hūñ zalālat kī ga.ī mujh se

zalālat kī ga.ī mujh se ḳhayānat kī ga.ī mujh se

jozāmī ho ga.ī 'vazzāh' kī mahbūb vāvailā

magar is kā gila kyā jab nahīñ aayā koī eilā

suno merī kahānī par miyāñ merī kahānī kyā

maiñ yaksar rā.igānī huuñ hisāb-e-rā.igānī kyā

bahut kuchh thā kabhī shāyad par ab kuchh bhī nahīñ huuñ maiñ

na apnā ham-nafas huuñ maiñ na apnā ham-nashīñ huuñ maiñ

kabhī kī baat hai fariyād merā vo kabhī ya.anī

nahīñ is kā koī matlab nahīñ is ke koī ma.anī

maiñ apne shahr kā sab se girāmī naam laḌkā thā

maiñ be-hañgām laḌkā thā maiñ sad-hañgām laḌkā thā

mire dam se ġhazab hañgāma rahtā thā mohalloñ meñ

maiñ hashr-āġhāz laḌkā thā maiñ hashr-anjām laḌkā thā

mire hindū musalmāñ sab mujhe sar par biThāte the

unhī ke faiz se ma.anī mujhe ma.anī sikhāte the

suḳhan bahtā chalā aatā hai be-bā.is ke hoñToñ se

vo kuchh kahtā chalā aatā hai be-bā.is ke hoñToñ se

maiñ ashrāf-e-kamīna-kār ko Thokar pe rakhtā thā

so maiñ mehnat-kashoñ kī jūtiyāñ mimbar pe rakhtā thā

maiñ shāyad ab nahīñ huuñ vo magar ab bhī vahī huuñ maiñ

ġhazab hañgāma-parvar ḳhīra-sar ab bhī vahī huuñ maiñ

magar merā thā ik taur aur bhī jo aur hī kuchh thā

magar merā thā ik daur aur bhī jo aur hī kuchh thā

maiñ apne shahr-e-ilm-o-fan kā thā ik naujavāñ kāhin

mire tilmīz-e-ilm-o-fan mire baabā ke the ham-sin

mirā baabā mujhe ḳhāmosh āvāzeñ sunātā thā

vo apne-āp meñ gum mujh ko pur-hālī sikhātā thā

vo hai.at-dāñ vo aalim nāf-e-shab meñ chhat pe jaatā thā

rasad kā rishta sayyāroñ se rakhtā thā nibhātā thā

use ḳhvāhish thī shohrat kī na koī hirs-e-daulat thī

baḌe se qutr kī ik dūrbīn us kī zarūrat thī

mirī maañ kī tamannāoñ kā qātil thā vo qallāma

mirī maañ merī mahbūba qayāmat kī hasīna thī

sitam ye hai ye kahne se jhijaktā thā vo fahhāma

thā behad ishti.āl-añgez bad-qismat o allāma

ḳhalaf us ke ḳhazaf aur be-nihāyat nā-ḳhalaf nikle

ham us ke saare beTe intihā.ī be-sharaf nikle

maiñ us ālim-tarīn-e-dahr kī fikrat kā munkir thā

maiñ fastā.ī thā jāhil thā aur mantiq kā māhir thā

par ab merī ye shohrat hai ki maiñ bas ik sharābī huuñ

maiñ apne dūdmān-e-ilm kī ḳhāna-ḳharābī huuñ

sagān-e-ḳhūk zād-e-barzan o bāzār-e-be-maġhzī

mirī jānib ab apne thobaḌe shāhāna karte haiñ

zinā-zāde mirī izzat bhī gustāḳhāna karte haiñ

kamīne sharm bhī ab mujh se be-sharmāna karte the

mujhe is shaam hai apne laboñ par ik suḳhan laanā

'alī' darvesh thā tum us ko apnā jadd na batlānā

vo sibtain-e-mohamād, jin ko jaane kyuuñ bahut arfa.a

tum un kī duur kī nisbat se bhī yaksar mukar jaanā

ki is nisbat se zahar o zaḳhm ko sahnā zarūrī hai

ajab ġhairat se ġhaltīda-ba-ḳhūñ rahnā zarūrī hai

vo shajra jo kanāna fahr ġhālib ka.ab marra se

qusai o hāshim o sheba abū-tālib tak aatā thā

vo ik andoh thā tārīḳh kā andoh-e-sozinda

vo nāmoñ kā daraḳht-e-zard thā aur us kī shāḳhoñ ko

kisī tannūr ke haizam kī ḳhākistar hī banñā thā

use sho.ala-zada būdash kā ik bistar hī banñā thā

hamārā faḳhr thā faqr aur dānish apnī pūñjī thī

nasab-nāmoñ ke ham ne kitne hī parcham lapeTe haiñ

mire ham-shahr 'zaryūn' ik fusūñ hai nasl ham, donoñ

faqat aadam ke beTe haiñ faqat aadam ke beTe haiñ

maiñ jab ausān apne khone lagtā huuñ to hañstā huuñ

maiñ tum ko yaad kar ke rone lagtā huuñ to hañstā huuñ

hamesha maiñ ḳhudā hāfiz hamesha maiñ ḳhudā hāfiz

ḳhudā hāfiz

ḳhudā hāfiz

nahin malum 'zaryun' ab tumhaari umr kya hogi

wo kin KHwabon se jaane aashna na-ashna hogi

tumhaare dil ke is duniya se kaise silsile honge

tumhein kaise guman honge tumhein kaise gile honge

tumhaari subh jaane kin KHayalon se nahati ho

tumhaari sham jaane kin malalon se nibhati ho

na jaane kaun doshiza tumhaari zindagi hogi

na jaane us ki kya bayastagi shaistagi hogi

use tum phone karte aur KHat likhte rahe hoge

na jaane tum ne kitni kam ghalat urdu likhi hogi

ye KHat likhna to daqyanus ki piDhi ka qissa hai

ye sinf-e-nasr hum na-baalighon ke fan ka hissa hai

wo hansti ho to shayad tum na rah pate ho haalon mein

gaDha nanha sa paD jata ho shayad us ke galon mein

guman ye hai tumhaari bhi rasai na-rasai ho

wo aai ho tumhaare pas lekin aa na pai ho

wo shayad maide ki gand biryani na khati ho

wo nan-e-be-KHamir-e-maida kam-tar hi chabaati ho

wo doshiza bhi shayad dastanon ki ho dil-dada

use malum hoga 'zal' tha 'sohrab' ka dada

tahamtan yani 'rustam' tha girami 'sam' ka waris

girami 'sam' tha sulb-e-nar-e-'mani' ka KHush-zada

(ye meri ek KHwahish hai jo mushkil hai)

wo 'najm'-afandi-e-marhum ko to jaanti hogi

wo nauhon ke adab ka tarz to pahchanti hogi

use kad hogi shayad un sabhi se jo lapaDi hon

na honge KHwab us ka jo gawayye aur khilaDi hon

hadaf honge tumhaara kaun tum kis ke hadaf hoge

na jaane waqt ki paikar mein tum kis taraf hoge

hai ran ye zindagi ek ran jo barpa lamha lamha hai

hamein is ran mein kuchh bhi ho kisi jaanib to hona hai

so hum bhi is nafas tak hain sipahi ek lashkar ke

hazaron sal se jite chale aae hain mar mar ke

shuhud ek fan hai aur meri adawat be-fanon se hai

meri paikar azal se

ye 'KHusro' 'mir' 'ghaalib' ka KHaraba bechta kya hai

hamara 'ghaalib'-e-azam tha chor aaqa-e-'bedil' ka

so rizq-e-faKHr ab hum kha rahe hain 'mir'-e-bismil ka

sidhaarat bhi tha sharminda ki do-abe ka basi tha

tumhein malum hai urdu jo hai pali se nikli hai

wo goya us ki hi ek pur-numu Dali se nikli hai

ye kaDwahaT ki baaten hain miThas in ki na puchho tum

nam-e-lab ko tarasti hain so pyas in ki na puchho tum

ye ek do juron ki ek chuhl hai aur chuhl mein kya hai

awamunnas se puchho bhala al-kuhl mein kya hai

ye tan-o-tanz ki harza-sarai ho nahin sakti

ki meri jaan mere dil se rishta kho nahin sakti

nasha chaDhne laga hai aur chaDhna chahiye bhi tha

abas ka nirKH to is waqt baDhna chahiye bhi tha

ajab be-majra be-taur be-zarana haalat hai

wajud ek wahm hai aur wahm hi shayad haqiqat hai

gharaz jo haal tha wo nafs ke bazar hi ka tha

hai ze bazar mein to darmiyan 'zaryun' mein awwal

to ye ibrafaniqi khelte harfon se the har pal

to ye 'zaryun' jo hai kya ye aflatun hai koi

aman 'zaryun' hai 'zaryun' wo majun kyun hota

hain majunen mufid arwah ko majun yun hota

suno tafriq kaise ho bhala ashKHas o ashya mein

bahut janjal hain par ho yahan to ya mein aur ya mein

tumhaari jo hamasa hai bhala us ka to kya kahna

hai shayad mujh ko sari umr us ke sehr mein rahna

magar mere gharib ajdad ne bhi kuchh kiya hoga

bahut tuchcha sahi un ka bhi koi majra hoga

ye hum jo hain hamari bhi to hogi koi nauTanki

hamara KHun bhi sach-much ka sehne par baha hoga

hai aaKHir zindagi KHun az-bun-e-naKHun bar-awar-tar

qayamat saneha matlab qayamat fajea parwar

nahin ho tum mere aur mera farda bhi nahin mera

so main ne sahat-e-diroz mein Dala hai ab Dera

mere diroz mein zahr-e-halahal tegh-e-qatil hai

mere ghar ka wahi sarnam-tar hai jo bhi bismil hai

guzasht-e-waqt se paiman hai apna ajab sa kuchh

so ek mamul hai imran ke ghar ka ajab sa kuchh

'hasan' nami hamare ghar mein ek 'suqraat' guzra hai

wo apni nafi se isbaat tak mashar ke pahuncha hai

ki KHun-e-raegan ke amr mein paDna nahin hum ko

wo sud-e-haal se yaksar ziyan-karana guzra hai

talab thi KHun ki qai ki use aur be-nihayat thi

so fauran bint-e-ashash ka pilaya pi gaya hoga

wo ek lamhe ke andar sarmadiyyat ji gaya hoga

tumhaari arjumand ammi ko main bhula bahut din mein

main un ki rang ki taskin se nimTa bahut din mein

wahi to hain jinhon ne mujh ko paiham rang thukwaya

wo kis rag ka lahu hai jo miyan main ne nahin thuka

lahu aur thukna us ka hai karobar bhi mera

yahi hai sakh bhi meri yahi mear bhi mera

main wo hun jis ne apne KHun se mausam khilae hain

na-jaane waqt ke kitne hi aalam aazmae hain

main ek tariKH hun aur meri jaane kitni faslen hain

meri kitni hi faren hain meri kitni hi aslen hain

hawadis majra hi hum rahe hain ek zamane se

shadaed saneha hi hum rahe hain ek zamane se

hamesha se bapa ek jang hai hum us mein qaem hain

hamari jang KHair o shar ke bistar ki hai zaida

ye charKH-e-jabr ke dawwar-e-mumkin ki hai girwida

laDai ke liye maidan aur lashkar nahin lazim

sinan o gurz o shamshir o tabar KHanjar nahin lazim

bas ek ehsas lazim hai ki hum buadain hain donon

ki nafi-e-ain-e-ain o sar-ba-sar ziddain hain donon

luis-urbina ne meri ajab kuchh gham-gusari ki

ba-sad dil danishi guzran apni mujh pe tari ki

bahut us ne pilai aur pine hi na di mujh ko

palak tak us ne marne ke liye jine na di mujh ko

main tere ishq mein ranjida hun han ab bhi kuchh kuchh hun

mujhe teri KHayanat ne ghazab majruh kar Dala

magar taish-e-shadidana ke baad aaKHir zamane mein

raza ki jawidana jabr ki naubat bhi aa pahunchi

mohabbat ek paspai hai pur-ahwal haalat ki

mohabbat apni yak-tauri mein dushman hai mohabbat ki

suKHan mal-e-mohabbat ki dukan-arai karta hai

suKHan sau tarah se ek ramz ki ruswai karta hai

suKHan bakwas hai bakwas jo Thahra hai fan mera

wo hai tabir ka aflas jo Thahra hai fan mera

suKHan yani labon ka fan suKHan-war yani ek pur-fan

suKHan-war izad achchha tha ki aadam ya phir ahriman

mazid aanki suKHan mein waqt hai waqt ab se ab yani

kuchh aisa hai ye main jo hun ye main apne siwa hun main

so apne aap mein shayad nahin waqe hua hun main

jo hone mein ho wo har lamha apna ghair hota hai

ki hone ko to hone se ajab kuchh bair hota hai

yunhi bas yunhi 'zenu' ne yakayak KHud-kushi kar li

ajab hiss-e-zarafat ke the malik ye rawaqi bhi

bidah yara azan baada ki dahqan parward aan-ra

ba sozad har mata-e-intimae dudmanan ra

ba-sozad in zamin-e-e'tibar-o-asmanan ra

ba-sozad jaan o dil raham bayasayad dil o jaan ra

dil o jaan aur aasaish ye ek kauni tamasKHur hai

humuq ki abqariyyat hai safahat ka tafakkur hai

humuq ki abqariyyat aur safahat ke tafakkur ne

hamein tazi-e-mohlat ke liye akwan baKHshe hain

aur aflatun-e-aqdas ne hamein aayan baKHshe hain

suno 'zaryun' tum to ain-e-ayan-e-haqiqat ho

nazar se dur manzar ka sar-o-saman-e-sarwat ho

hamari umr ka qissa hisab andoz-e-ani hai

zamani zad mein zan ki ek guman-e-lazimani hai

guman ye hai ki baqi hai baqa har aan fani hai

kahani sunne wale jo bhi hain wo KHud kahani hain

kahani kahne wala ek kahani ki kahani hai

piya pe ye gudazish ye guman aur ye gile kaise

sila-sozi to mera fan hai phir is ke sile kaise

to main kya kah raha tha yani kya kuchh sah raha tha main

aman han mez par ya mez par se bah raha tha main

ruko main be-sar-o-pa apne sar se bhag nikla hun

ila ya ayyuhal-abjad zara yani zara Thahro

There is an absurd i in absurdity shayad

kahin apne siwa yani kahin apne siwa Thahro

tum is absurdity mein ek radif ek qafiya Thahro

radif o qafiya kya hain shikast-e-na-rawa kya hai

shikast-e-narawa ne mujh ko para para kar Dala

ana ko meri be-andaza-tar be-chaara kar Dala

main apne aap mein haara hun aur KHwarana haara hun

jigar-chaakana haara hun dil-afgarana haara hun

jise fan kahte aae hain wo hai KHun-e-jigar apna

magar KHun-e-jigar kya hai wo hai kattal-tar apna

koi KHun-e-jigar ka fan zara tabir mein lae

magar main to kahun wo pahle mere samne aae

wajud o sher ye donon define ho nahin sakte

kabhi mafhum mein hargiz ye kain ho nahin sakte

hisab-e-harf mein aata raha hai bas hasab un ka

nahin malum izad izdan ko bhi nasab un ka

hai izad izdan ek ramz jo be-ramz nisbat hai

miyan ek haal hai ek haal jo be-haal-e-haalat hai

na jaane jabr hai haalat ki haalat jabr hai yani

kisi bhi baat ke mani jo hain un ke hain kya mani

wajud ek jabr hai mera adam auqat hai meri

jo meri zat hargiz bhi nahin wo zat hai meri

main roz-o-shab nigarish-kosh KHud apne adam ka hun

main apna aadmi hargiz nahin lauh-o-qalam ka hun

hain kaDwahaT mein ye bhige hue lamhe ajab se kuchh

sarasar be-hisabana sarasar be-sabab se kuchh

sarabon ne sarabon par bahut baadal hain barsae

sharabon ne maabad ke tamuz o baal nahlae

(yaqinan qafiya hai yawa-farmai ka sar-chashma

hain nahlae hain barsae)

na jaane aariba kyun aae kyun mustaraba aae

muzir ke log to chhane hi wale the so wo chhae

mere jad hashim-e-ali gae gazza mein dafnae

main naqe ko pilaunga mujhe wan tak wo le jae

lidu lilmauti wabnu lilhizabi san KHarabaati

wo mard-e-us kahta hai haqiqat hai KHurafati

ye zalim tisra paig ek aqanimi bidayat hai

uluhi harza-farmai ka sirr-e-tur-e-luknat hai

bhala hurab ki jhaDi ka wo ramz-e-atishin kya tha

magar hurab ki jhaDi kya ye kis se kis ki nisbat hai

ye nisbat ke bahut se qafiye hain hai gila is ka

magar tujh ko to yara! qafiyon ki be-tarah lat hai

guman ye hai ki shayad bahr se KHarij nahin hun main

zara bhi haal ke aahang mein haarij nahin hun

tana-tan tan tana-tan tan tana-tan tan tana-tan tan

tana-tan tan nahin mehnat-kashon ka tan na pairahan

na pairahan na puri aadhi roTi ab raha salan

ye sale kuchh bhi khane ko na paen galiyan khaen

hai in ki be-hisi mein to muqaddas-tar harami-pan

magar aahang mera kho gaya shayad kahan jaane

koi mauj-e- koi mauj-e-shumal-e-jawedan jaane

shumal-e-jawedan ke apne hi qisse the jo guzre

wo ho guzre to phir KHud main ne bhi jaana wo ho guzre

shumal-e-jawedan apna shumal-e-jawedan-e-jaan

hai ab bhi apni punji ek malal-e-jawedan-e-jaan

nahin malum 'zayun' ab tumhaari umr kya hogi

yahi hai dil ka mazmun ab tumhaari umr kya hogi

hamare darmiyan ab ek beja-tar zamana hai

lab-e-tishna pe ek zahr-e-haqiqat ka fasana hai

ajab fursat mayassar aai hai dil jaan rishte ko

na dil ko aazmana hai na jaan ko aazmana hai

kalid-e-kisht-zar-e-KHwab bhi gum ho gai aaKHir

kahan ab jada-e-KHurram mein sar-sabzana jaana hai

kahun to kya kahun mera ye zaKHm-e-jawedana hai

wahi dil ki haqiqat jo kabhi jaan thi wo ab aaKHir

fasana dar fasana dar fasana dar fasana hai

hamara bahami rishta jo hasil-tar tha rishton ka

hamara taur-e-be-zari bhi kitna walihana hai

kisi ka nam likkha hai meri sari bayazon par

main himmat kar raha hun yani ab us ko miTana hai

ye ek sham-e-azab-e-be-sarokana haalat hai

hue jaane ki haalat mein hun bas fursat hi fursat hai

nahin malum tum is waqt kis malum mein hoge

na jaane kaun se mani mein kis mafhum mein hoge

main tha mafhum na-mafhum mein gum ho chuka hun main

main tha malum na-malum mein gum ho chuka hun main

nahin malum 'zaryun' ab tumhaari umr kya hogi

mere KHud se guzarne ke zamane se siwa hogi

mere qamat se ab qamat tumhaara kuchh fuzun hoga

mera farda mere diroz se bhi KHush numun hoga

hisab-e-mah-o-sal ab tak kabhi rakkha nahin main ne

kisi bhi fasl ka ab tak maza chakkha nahin main ne

main apne aap mein kab rah saka kab rah saka aaKHir

kabhi ek pal ko bhi apne liye socha nahin main ne

hisab-e-mah-o-sal o roz-o-shab wo soKHta-budash

musalsal jaan-kani ke haal mein rakhta bhi to kaise

jise ye bhi na ho malum wo hai bhi to kyun-kar hai

koi haalat dil-e-pamal mein rakhta bhi to kaise

koi nisbat bhi ab to zat se bahar nahin meri

koi bistar nahin mera koi chadar nahin meri

ba-haal-e-na-shita sad-zaKHm-ha o KHun-ha KHudam

ba-har-dam shukaran aameKHta majun-ha KHudam

tumhein is baat se matlab hi kya aur aaKHirash kyun ho

kisi se bhi nahin mujh ko gila aur aaKHirash kyun ho

jo hai ek nang-e-hasti us ko tum kya jaan bhi loge

agar tum dekh lo mujh ko to kya pahchan bhi loge

tumhein mujh se jo nafrat hai wahi to meri rahat hai

meri jo bhi aziyyat hai wahi to meri lazzat hai

ki aaKHir is jahan ka ek nizam-e-kar hai aaKHir

jaza ka aur saza ka koi to hanjar hai aaKHir

main KHud mein jhenkta hun aur sine mein bhaDakta hun

mere andar jo hai ek shaKHs main us mein phaDakta hun

hai meri zindagi ab roz-o-shab yak-majlis-e-gham-ha

aza-ha marsiya-ha girya-ha aashob-e-matam-ha

tumhaari tarbiyat mein mera hissa kam raha kam-tar

zaban meri tumhaare waste shayad ki mushkil ho

zaban apni zaban main tum ko aaKHir kab sikha paya

azab-e-sad-shamatat aaKHirash mujh par hi nazil ho

zaban ka kaam yun bhi baat samjhana nahin hota

samajh mein koi bhi matlab kabhi aana nahin hota

kabhi KHud tak bhi matlab koi pahunchana nahin hota

gumanon ke guman ki dam-ba-dam aashob-kari hai

bhala kya e'tibari aur kya na-e'tibari hai

guman ye hai bhala mein juz guman kya tha gumanon mein

suKHan hi kya fasanon ka dhara kya hai fasanon mein

mera kya tazkira aur waqai kya tazkira mera

main ek afsos tha afsos hun guzre zamanon mein

hai shayad dil mera be-zaKHm aur lab par nahin chhaale

mere sine mein kab sozinda-tar daghon ke hain thaale

magar dozaKH pighal jae jo mere sans apna le

tum apni mam ke behad muradi minnaton wale

mere kuchh bhi nahin kuchh bhi nahin kuchh bhi nahin baale

magar pahle kabhi tum se mera kuchh silsila to tha

guman mein mere shayad ek koi ghuncha khila to tha

wo meri jawedana be-dui ka ek sila to tha

so us ko ek abbu nam ka ghoDa mila to tha

saya-e-daman-e-rahmat chahiye thoDa mujhe

main na chhoDun ya nabi tum ne agar chhoDa mujhe

id ke din mustafa se yun lage kahne 'husain'

sabz joDa do 'hasan' ko surKH do joDa mujhe

adab adab kutte tere kan kaTun

'zaryun' ke byah ke nan baTun

taron bhare jagar jagar KHwan baTun

aa ja ri nindiya tu aa kyun na ja

'zaryun' ko aa ke sula kyun na ja

tumhaare byah mein shajara paDha jaana tha nausha wasti dulha

chauki aangan mein bichhi wasti dulha ke liye

makke madine ke pak musalle payambar ghar nawase

shah-e-mardan amirul-maminin hazrat-'ali' ke pote

hazrat imam-'hasan' hazrat imam-'husain' ke pote

hazrat imam-ali-'naqi' ke pote

sayyad-'jafar' sani ke pote

sayyad abul-farah saidwail-wasti ke pote

miran sayyad-'ali'-buzurg ke pote

sayyad-'husain'-sharfuddin shah-wilayat ke pote

qazi sayyad-'amir'-ali ke pote

diwan sayyad-'hamid' ke pote

allama sayyad-shafiq-'hasan'-eliya ke pote

sayyad-'jaun'-eliya hasani-ul-husaini saput-jah

magar nazir hamara soKHta-sulb aaKHiri nassab ab marne hi wala hai

bas ek pal haf sadi ka faisla karne hi wala hai

suno 'zaryun' bas tum hi suno yani faqat tum hi

wahi rahat mein hai jo aam se hone ko apna le

kabhi koi bhi par ho koi 'bahman' yar ya 'zenu'

tumhein bahka na pae aur bairuni na kar Dale

main sari zindagi ke dukh bhugat kar tum se kahta hun

bahut dukh degi tum mein fikr aur fan ki numu mujh ko

tumhaare waste behad sahulat chahta hun main

dawam-e-jahl o haal-e-istirahat chahta hun main

na dekho kash tum wo KHwab jo dekha kiya hun main

wo sare KHwab the qassab jo dekha kiya hun main

KHarash-e-dil se tum be-rishta be-maqdur hi Thahro

mere jahmim-e-zat-e-zat se tum dur hi Thahro

koi 'zaryun' koi bhi clerk aur koi karinda

koi bhi bank ka afsar senator koi pawanda

har ek haiwan-e-sarkari ko TaTTu jaanta hun main

so zahir hai ise shai se ziyaada manta hun main

tumhein ho subh-dam taufiq bas aKHbar paDhne ki

tumhein ai kash bimari na ho diwar paDhne ki

ajab hai 'sartre' aur 'ressel' bhi aKHbar paDhte the

wo malumat ke maidan ke shauqin buDhe the

nahin malum mujh ko aam shahri kaise hote hain

wo kaise apna banjar nam banjar-pan mein bote hain

main urr se aaj tak ek aam shahri ho nahin paya

isi bais main hun amboh ki lazzat se be-maya

magar tum ek do-paya rast qamat ho ke dikhlana

suno rae-dahinda bin hue tum baz mat aana

faqat 'zaryun' ho tum yani apna sabiqa chhoDo

faqat 'zaryun' ho tum yani apna lahiqa chhoDo

magar main kaun jo chahun tumhaare bab mein kuchh bhi

bhala kyun ho mere ehsas ke asbab mein kuchh bhi

tumhaara bap yani main abas main ek abas-tar main

magar main yani jaane kaun achchha main sarasar main

main kasa-baz o kina-saz o kasa-tan hun kutta hun

main ek nangin-e-budash hun pa tum to sirr-e-munam ho

tumhaara bap ruhul-quds tha tum ibn-e-maryam ho

ye qulqul tisra paig ab to chautha ho guman ye hai

guman ka mujh se koi KHas rishta ho guman ye hai

guman ye hai ki main jo ja raha tha aa raha hun main

magar main aa raha kab hun piyape ja raha hun main

ye chautha paig hai un-hun zalalat ki gai mujh se

zalalat ki gai mujh se KHayanat ki gai mujh se

jozami ho gai 'wazzah' ki mahbub wawaila

magar is ka gila kya jab nahin aaya koi eila

suno meri kahani par miyan meri kahani kya

main yaksar raigani hun hisab-e-raigani kya

bahut kuchh tha kabhi shayad par ab kuchh bhi nahin hun main

na apna ham-nafas hun main na apna ham-nashin hun main

kabhi ki baat hai fariyaad mera wo kabhi yani

nahin is ka koi matlab nahin is ke koi mani

main apne shahr ka sab se girami nam laDka tha

main be-hangam laDka tha main sad-hangam laDka tha

mere dam se ghazab hangama rahta tha mohallon mein

main hashr-aghaz laDka tha main hashr-anjam laDka tha

mere hindu musalman sab mujhe sar par biThate the

unhi ke faiz se mani mujhe mani sikhate the

suKHan bahta chala aata hai be-bais ke honTon se

wo kuchh kahta chala aata hai be-bais ke honTon se

main ashraf-e-kamina-kar ko Thokar pe rakhta tha

so main mehnat-kashon ki jutiyan mimbar pe rakhta tha

main shayad ab nahin hun wo magar ab bhi wahi hun main

ghazab hangama-parwar KHira-sar ab bhi wahi hun main

magar mera tha ek taur aur bhi jo aur hi kuchh tha

magar mera tha ek daur aur bhi jo aur hi kuchh tha

main apne shahr-e-ilm-o-fan ka tha ek naujawan kahin

mere tilmiz-e-ilm-o-fan mere baba ke the ham-sin

mera baba mujhe KHamosh aawazen sunata tha

wo apne-ap mein gum mujh ko pur-haali sikhata tha

wo haiat-dan wo aalim naf-e-shab mein chhat pe jata tha

rasad ka rishta sayyaron se rakhta tha nibhata tha

use KHwahish thi shohrat ki na koi hirs-e-daulat thi

baDe se qutr ki ek durbin us ki zarurat thi

meri man ki tamannaon ka qatil tha wo qallama

meri man meri mahbuba qayamat ki hasina thi

sitam ye hai ye kahne se jhijakta tha wo fahhama

tha behad ishtial-angez bad-qismat o allama

KHalaf us ke KHazaf aur be-nihayat na-KHalaf nikle

hum us ke sare beTe intihai be-sharaf nikle

main us aalim-tarin-e-dahr ki fikrat ka munkir tha

main fastai tha jahil tha aur mantiq ka mahir tha

par ab meri ye shohrat hai ki main bas ek sharabi hun

main apne dudman-e-ilm ki KHana-KHarabi hun

sagan-e-KHuk zad-e-barzan o bazar-e-be-maghzi

meri jaanib ab apne thobaDe shahana karte hain

zina-zade meri izzat bhi gustaKHana karte hain

kamine sharm bhi ab mujh se be-sharmana karte the

mujhe is sham hai apne labon par ek suKHan lana

'ali' darwesh tha tum us ko apna jadd na batlana

wo sibtain-e-mohamad, jin ko jaane kyun bahut arfa

tum un ki dur ki nisbat se bhi yaksar mukar jaana

ki is nisbat se zahar o zaKHm ko sahna zaruri hai

ajab ghairat se ghaltida-ba-KHun rahna zaruri hai

wo shajra jo kanana fahr ghaalib kab marra se

qusai o hashim o sheba abu-talib tak aata tha

wo ek andoh tha tariKH ka andoh-e-sozinda

wo namon ka daraKHt-e-zard tha aur us ki shaKHon ko

kisi tannur ke haizam ki KHakistar hi banna tha

use shoala-zada budash ka ek bistar hi banna tha

hamara faKHr tha faqr aur danish apni punji thi

nasab-namon ke hum ne kitne hi parcham lapeTe hain