darbari mughanni

maiñ ek dhutkārā huā

darbārī muġhannī huuñ

darbār se dhutkār diye jaane se pahle

mere halq meñ sindūr kī ek puurī shīshī

ulaT dī ga.ī hai

ab merā galā

mahz ġhizā kī naalī ban kar rah gayā hai

mujhe apne gale ke soz-o-sāz se mahrūm kiye jaane se ziyāda afsos

us baat kā hai

ki maiñ apne me.ade meñ utrī huī ashrafiyāñ

marvārīd aur nīlam

shāhī mahal meñ thuuk kar nahīñ aayā

un sab ne mere me.ade meñ apne liye

koī gunjā.ish sur alāpnā chāhūñ

to ye ashrafiyāñ

marvārīd aur nīlam

mere me.ade meñ dahakne lagte haiñ

jis tashtarī meñ mujhe

ye ashrafiyāñ marvārīd aur nīlam pesh kiye jaate the

ab us tashtarī meñ

mahal ke ḳhvāja-sarā ke pāltū kutte ko

rātib diyā jaatā hai

jis ke me.ade meñ koī chiiz

ziyāda der tak nahīñ Tiktī

kabhī kabhī ye kuttā

ḳhvāja-sarā ke pair chāTte chāTte

bādshāh par bhūñkne bhī lagtā hai

kaash maiñ ek baar hī aisā kar saktā

main ek dhutkara hua

darbari mughanni hun

darbar se dhutkar diye jaane se pahle

mere halq mein sindur ki ek puri shishi

ulaT di gai hai

ab mera gala

mahz ghiza ki nali ban kar rah gaya hai

mujhe apne gale ke soz-o-saz se mahrum kiye jaane se ziyaada afsos

us baat ka hai

ki main apne meade mein utri hui ashrafiyan

marwarid aur nilam

shahi mahal mein thuk kar nahin aaya

un sab ne mere meade mein apne liye

koi gunjaish sur alapna chahun

to ye ashrafiyan

marwarid aur nilam

mere meade mein dahakne lagte hain

jis tashtari mein mujhe

ye ashrafiyan marwarid aur nilam pesh kiye jate the

ab us tashtari mein

mahal ke KHwaja-sara ke paltu kutte ko

raatib diya jata hai

jis ke meade mein koi chiz

ziyaada der tak nahin Tikti

kabhi kabhi ye kutta

KHwaja-sara ke pair chaTte chaTte

baadshah par bhunkne bhi lagta hai

kash main ek bar hi aisa kar sakta