dard aaega dabe panw

aur kuchh der meñ jab phir mire tanhā dil ko

fikr aa legī ki tanhā.ī kā kyā chāra kare

dard aa.egā dabe paañv liye surḳh charāġh

vo jo ik dard dhaḌaktā hai kahīñ dil se pare

shola-e-dard jo pahlū meñ lapak uTThegā

dil kī dīvār pe har naqsh damak uTThegā

halqa-e-zulf kahīñ gosha-e-ruḳhsār kahīñ

hijr kā dasht kahīñ gulshan-e-dīdār kahīñ

lutf kī baat kahīñ pyaar kā iqrār kahīñ

dil se phir hogī mirī baat ki ai dil ai dil

ye jo mahbūb banā hai tirī tanhā.ī kā

ye to mehmāñ hai ghaḌī-bhar kā chalā jā.egā

us se kab terī musībat kā mudāvā hogā

mushta.il ho ke abhī uTTheñge vahshī saa.e

ye chalā jā.egā rah jā.eñge baaqī saa.e

rāt-bhar jin se tirā ḳhūn-ḳharābā hogā

jañg Thahrī hai koī khel nahīñ hai ai dil

dushman-e-jāñ haiñ sabhī saare ke saare qātil

ye kaḌī raat bhī ye saa.e bhī tanhā.ī bhī

dard aur jañg meñ kuchh mel nahīñ hai ai dil

laao sulgāo koī josh-e-ġhazab kā añgār

taish kī ātish-e-jarrār kahāñ hai laao

vo dahaktā huā gulzār kahāñ hai laao

jis meñ garmī bhī hai harkat bhī tavānā.ī bhī

ho na ho apne qabīle kā bhī koī lashkar

muntazir hogā añdhere kī fasīloñ ke udhar

un ko sholoñ ke rajaz apnā patā to deñge

ḳhair ham tak vo na pahuñche bhī sadā to deñge

duur kitnī hai abhī sub.h batā to deñge

aur kuchh der mein jab phir mere tanha dil ko

fikr aa legi ki tanhai ka kya chaara kare

dard aaega dabe panw liye surKH charagh

wo jo ek dard dhaDakta hai kahin dil se pare

shola-e-dard jo pahlu mein lapak uTThega

dil ki diwar pe har naqsh damak uTThega

halqa-e-zulf kahin gosha-e-ruKHsar kahin

hijr ka dasht kahin gulshan-e-didar kahin

lutf ki baat kahin pyar ka iqrar kahin

dil se phir hogi meri baat ki ai dil ai dil

ye jo mahbub bana hai teri tanhai ka

ye to mehman hai ghaDi-bhar ka chala jaega

us se kab teri musibat ka mudawa hoga

mushtail ho ke abhi uTThenge wahshi sae

ye chala jaega rah jaenge baqi sae

raat-bhar jin se tera KHun-KHaraba hoga

jang Thahri hai koi khel nahin hai ai dil

dushman-e-jaan hain sabhi sare ke sare qatil

ye kaDi raat bhi ye sae bhi tanhai bhi

dard aur jang mein kuchh mel nahin hai ai dil

lao sulgao koi josh-e-ghazab ka angar

taish ki aatish-e-jarrar kahan hai lao

wo dahakta hua gulzar kahan hai lao

jis mein garmi bhi hai harkat bhi tawanai bhi

ho na ho apne qabile ka bhi koi lashkar

muntazir hoga andhere ki fasilon ke udhar

un ko sholon ke rajaz apna pata to denge

KHair hum tak wo na pahunche bhi sada to denge

dur kitni hai abhi subh bata to denge