darichon ke tale

aaj phir zehn ke in band darīchoñ ke tale

dil meñ so.e hue ehsās ne karvaT badlī

aur chupke se mahak uTThā tirī yaad kā phuul

zaḳhm ne aañkh malī yaas ne karvaT badlī

gungunāne lage majrūh tamannāoñ ke lab

ruuh ke jism se naġhmāt ke dhāre phūTe

barf maazī kī pighalne lagī qatra qatra

dil se pur-soz ḳhayālāt ke dhāre phūTe

vaqt kī dhuul meñ lipTe hue yādoñ ke charāġh

tere chehre kī ra.ūnat ko jilā dene lage

merī palkoñ se Tapakte hue ashkoñ ke guhar

mujh ko merī hī mohabbat kā sila dene lage

muddatoñ baa'd ik aḳhbār ke saf.ha pe mujhe

terī tasvīr nazar aa.ī kisī aur ke saath

tere pahlū meñ koī māh-jabīñ baiThī thī

na.e tevar na.e andāz na.e taur ke saath

karvaTeñ lene lagīñ dard kī lahreñ dil meñ

yaad kī raakh fazāoñ meñ bikharne sī lagī

zehn meñ guuñj uThī terī khanaktī āvāz

terī tahrīr nigāhoñ meñ ubharne sī lagī

ḳhud-baḳhud chashm se kuchh ashk ravāñ hone lage

apne māhaul pe hālāt pe ronā aaya

ka.ī sāloñ se jo bīmār nazar aatī haiñ

unhī farsūda rivāyāt pe ronā aaya

tere chehre meñ nazar aaya kisī aur kā ruup

yak-ba-yak sho.ala-e-ehsās tapāñ hone lagā

tere pahlū meñ jo ik māh-jabīñ baiThī thī

us kī sūrat pe mujhe apnā gumāñ hone lagā

mere hoñToñ pe tabassum kī kiran jaag uThī

dil ko soī huī ulfat kā ḳhayāl aa hī gayā

kaj-adā.ī meñ tirī raaz nihāñ hai kaisā

jaane kyoñ zehn meñ ye ek savāl aa hī gayā

terī tasvīr ne ye raaz magar faash kiyā

log kis tarah badal jaate haiñ dhīre dhīre

mom kī tarah badan un kā pighal jaatā hai

ik na.e sāñche meñ Dhal jaate haiñ dhīre dhīre

aaj phir zehn ke in band darichon ke tale

dil mein soe hue ehsas ne karwaT badli

aur chupke se mahak uTTha teri yaad ka phul

zaKHm ne aankh mali yas ne karwaT badli

gungunane lage majruh tamannaon ke lab

ruh ke jism se naghmat ke dhaare phuTe

barf mazi ki pighalne lagi qatra qatra

dil se pur-soz KHayalat ke dhaare phuTe

waqt ki dhul mein lipTe hue yaadon ke charagh

tere chehre ki raunat ko jila dene lage

meri palkon se Tapakte hue ashkon ke guhar

mujh ko meri hi mohabbat ka sila dene lage

muddaton ba'd ek aKHbar ke safha pe mujhe

teri taswir nazar aai kisi aur ke sath

tere pahlu mein koi mah-jabin baiThi thi

nae tewar nae andaz nae taur ke sath

karwaTen lene lagin dard ki lahren dil mein

yaad ki rakh fazaon mein bikharne si lagi

zehn mein gunj uThi teri khanakti aawaz

teri tahrir nigahon mein ubharne si lagi

KHud-baKHud chashm se kuchh ashk rawan hone lage

apne mahaul pe haalat pe rona aaya

kai salon se jo bimar nazar aati hain

unhi farsuda riwayat pe rona aaya

tere chehre mein nazar aaya kisi aur ka rup

yak-ba-yak shoala-e-ehsas tapan hone laga

tere pahlu mein jo ek mah-jabin baiThi thi

us ki surat pe mujhe apna guman hone laga

mere honTon pe tabassum ki kiran jag uThi

dil ko soi hui ulfat ka KHayal aa hi gaya

kaj-adai mein teri raaz nihan hai kaisa

jaane kyon zehn mein ye ek sawal aa hi gaya

teri taswir ne ye raaz magar fash kiya

log kis tarah badal jate hain dhire dhire

mom ki tarah badan un ka pighal jata hai

ek nae sanche mein Dhal jate hain dhire dhire