dariya-e-charls ke kinare ek nazm

ye girjā hai ki mujh par āsmāñ kī mehrbānī hai

salībī-jañg meñ saare sipāhī kaam aa.e

ab kise paanī pilāogī tum apne dāman-e-tar se

uThāogī kise phaile hue baazū pe niile nāḳhunoñ par rok logī

aañkh chehra

jab zamīñ par raakh hogī aur miTTī phail jā.egī

tanābeñ raakh ho jaa.eñ to miTTī phail jaatī hai

zamīnoñ āsmānoñ par

so girjā mujh pe niile āsmāñ kī mehrbānī hai

ye dariyā hai ki mujh par āsmāñ kī mehrbānī hai

zamīñ jab raakh ho jaa.e to dariyā phail jaatā hai

aur us ko rok letī ho tum apnī ḳhushk āñkhoñ meñ

badan kī aaḌ de kar

jab sipāhī rāste meñ baiTh jaate haiñ

bichhā dete haiñ saaya pattiyoñ phūloñ kināroñ kā

tumhāre dāman-e-tar kā

utar jaate haiñ giilī jhāḌiyoñ meñ aag le kar

āsmāñ dekhā nahīñ jaatā

to bhīgī ret ko sūkhī havā meñ chhānte haiñ

aur miTTī phail jaatī hai

ye miTTī mujh ko kal tak āsmānoñ meñ uḌātī thī

ye dariyā mujh ko kal tak khīñch laatā thā zamīnoñ par

ye miTTī phailtī jaatī hai

dariyā sūkhtā jaatā hai

mujh par āsmāñ kī mehrbānī hai

ye girja hai ki mujh par aasman ki mehrbani hai

salibi-jang mein sare sipahi kaam aae

ab kise pani pilaogi tum apne daman-e-tar se

uThaogi kise phaile hue bazu pe nile naKHunon par rok logi

aankh chehra

jab zamin par rakh hogi aur miTTi phail jaegi

tanaben rakh ho jaen to miTTi phail jati hai

zaminon aasmanon par

so girja mujh pe nile aasman ki mehrbani hai

ye dariya hai ki mujh par aasman ki mehrbani hai

zamin jab rakh ho jae to dariya phail jata hai

aur us ko rok leti ho tum apni KHushk aankhon mein

badan ki aaD de kar

jab sipahi raste mein baiTh jate hain

bichha dete hain saya pattiyon phulon kinaron ka

tumhaare daman-e-tar ka

utar jate hain gili jhaDiyon mein aag le kar

aasman dekha nahin jata

to bhigi ret ko sukhi hawa mein chhante hain

aur miTTi phail jati hai

ye miTTi mujh ko kal tak aasmanon mein uDati thi

ye dariya mujh ko kal tak khinch lata tha zaminon par

ye miTTi phailti jati hai

dariya sukhta jata hai

mujh par aasman ki mehrbani hai