dariya-e-ganga

gangā dariyā kī lahroñ kī ra.anā.ī kā kyā kahnā

kaisā pyārā pyārā hai is kā bal khā-khā kar kahnā

koh-e-himāla kī ūñchī jhīloñ se nikal kar aatā hai

vādiyoñ aur nasheboñ meñ tezī se chal kar aatā hai

laḌtā muḌtā girtā paḌtā aage baḌhtā rahtā hai

pag-pag par is kā pal-pal meñ paanī chaḌhtā rahtā hai

jharnā ban-ban kar girne meñ manzar ḳhuub dikhātā hai

pighlī huī chāñdī kī chādar patthar par phailātā hai

maidānoñ meñ aakar dhīmī dhīmī chaal se chaltā hai

lahrātā hai iThlātā hai bal khātā hai machaltā hai

is kī pyārī pyārī lahreñ dekh ke dil lahrātā hai

vo bhī paanī ke dhāre ke saath hī bahtā jaatā hai

is kī pyārī shobhā dekh ke sab nar-nārī jiite haiñ

āñkhoñ hī āñkhoñ meñ is bahte amrit ko piite haiñ

chhoTe-chhoTe aur bhī dariyā is meñ milte jaate haiñ

jaise bachche humak humak kar maañ kī god meñ aate haiñ

is dariyā se niklī haiñ aisī pyārī pyārī nahreñ

dil ko lubhāne vaalī haiñ jin kī bāñkī bāñkī lahreñ

kartī haiñ sairāb ye nahreñ bhārat ke maidānoñ ko

tāqat ye de detī haiñ lākhoñ kamzor kisānoñ ko

lākhoñ hī bīghe khetī hotī hai is se harī-bharī

jangal sahrā khet chaman bante haiñ in se sabz-parī

nahreñ ye lākhoñ hī insānoñ ke dil kā sahārā haiñ

nahreñ ye sab un kī āshāoñ kā bahtā dhārā haiñ

bahte rahnā is kā nit ye baat batātā rahtā hai

jo paiham kuchh kartā hai phal us kā paatā rahtā hai

bhārat kī ḳhidmat se is ne itnī azmat paa.ī hai

ḳhidmat kar ke ḳhidmat kī ḳhuub is ne raah dikhā.ī hai

ham bhī apnī koshish se sarsabz banā.eñ bhārat ko

aapas ke sab jhagḌe se āzād karā.eñ bhārat ko

gangā dariyā kyā hai 'nayyar' ye allah kī rahmat hai

gangā dariyā kyā hai hamāre des ke haq meñ ne.amat hai

ganga dariya ki lahron ki ranai ka kya kahna

kaisa pyara pyara hai is ka bal kha-kha kar kahna

koh-e-himala ki unchi jhilon se nikal kar aata hai

wadiyon aur nashebon mein tezi se chal kar aata hai

laDta muDta girta paDta aage baDhta rahta hai

pag-pag par is ka pal-pal mein pani chaDhta rahta hai

jharna ban-ban kar girne mein manzar KHub dikhata hai

pighli hui chandi ki chadar patthar par phailata hai

maidanon mein aakar dhimi dhimi chaal se chalta hai

lahraata hai iThlata hai bal khata hai machalta hai

is ki pyari pyari lahren dekh ke dil lahraata hai

wo bhi pani ke dhaare ke sath hi bahta jata hai

is ki pyari shobha dekh ke sab nar-nari jite hain

aankhon hi aankhon mein is bahte amrit ko pite hain

chhoTe-chhoTe aur bhi dariya is mein milte jate hain

jaise bachche humak humak kar man ki god mein aate hain

is dariya se nikli hain aisi pyari pyari nahren

dil ko lubhane wali hain jin ki banki banki lahren

karti hain sairab ye nahren bhaarat ke maidanon ko

taqat ye de deti hain lakhon kamzor kisanon ko

lakhon hi bighe kheti hoti hai is se hari-bhari

jangal sahra khet chaman bante hain in se sabz-pari

nahren ye lakhon hi insanon ke dil ka sahaara hain

nahren ye sab un ki aashaon ka bahta dhaara hain

bahte rahna is ka nit ye baat batata rahta hai

jo paiham kuchh karta hai phal us ka pata rahta hai

bhaarat ki KHidmat se is ne itni azmat pai hai

KHidmat kar ke KHidmat ki KHub is ne rah dikhai hai

hum bhi apni koshish se sarsabz banaen bhaarat ko

aapas ke sab jhagDe se aazad karaen bhaarat ko

ganga dariya kya hai 'nayyar' ye allah ki rahmat hai

ganga dariya kya hai hamare des ke haq mein neamat hai