dariya ke kinare

paanī bahtā chaltā hai

kuchh dukh sahtā chaltā hai

sannāTā sā kuchh chhāyā hai

paanī kuchh murjhāyā hai

lahreñ haiñ kuchh mailī mailī

maujeñ haiñ kuchh phailī phailī

taare jhuk jhuk paḌte haiñ

patte chup chup jhaḌte haiñ

abr ke TukḌe uḌte haiñ

kaTte haiñ phir juḌte haiñ

taare jham jham hote haiñ

taa.ir chupke sote haiñ

shāḳheñ sar-ba-garebāñ haiñ

bilkul chup aur hairāñ haiñ

chāñd bhī hai kuchh khoyā khoyā

kuchh jaagā kuchh soyā soyā

abr meñ chhup chhup jaatā hai

har taare ko chamkātā hai

kuchh bahkā bahkā chaltā hai

paanī meñ bhaTaktā chaltā hai

shabnam paT paT rotī hai

jo aañsū hai vo motī hai

jangal chupkā sotā hai

manzar par sannāTā hai

har patte meñ ḳhāmoshī hai

har koñpal meñ be-hoshī hai

har zarra chup hai qatra chup hai

aflāk kā ik ik taarā chup hai

sab gul-hā-e-raihāñ chup haiñ

champā kī sab kaliyāñ chup haiñ

dariyā kī sab maujeñ chup haiñ

bal khāne vaalī lahreñ chup haiñ

sotī hai guloñ meñ chup ḳhushbū

jhilmil hote haiñ jugnū

chaltī hai havā kuchh dhīme dhīme

phūloñ kī fazā meñ chupke chupke

halke halke giit sunātī

ruk ruk kar ik taan lagātī

bhīge bhīge phuul rasīle

chupke chupke haiñ kuchh hañste

ye ḳhāmoshī aur sannāTā

aur ye sākit mauj-e-dariyā

in āñkhoñ se kyā kyā dekhūñ

is duniyā kā har zarra dekhūñ

yā-rab ye sab manzar kyā haiñ

sahrā kyā haiñ ghar dar kyā haiñ

ḳhāmushī kyā sannāTā kyā hai

aadhī raat kā dariyā kyā hai

ye sab kyoñ hai ye sab kyā hai

ḳhud maiñ kyā huuñ 'jamāl' kyā hai

pani bahta chalta hai

kuchh dukh sahta chalta hai

sannaTa sa kuchh chhaya hai

pani kuchh murjhaya hai

lahren hain kuchh maili maili

maujen hain kuchh phaili phaili

tare jhuk jhuk paDte hain

patte chup chup jhaDte hain

abr ke TukDe uDte hain

kaTte hain phir juDte hain

tare jham jham hote hain

tair chupke sote hain

shaKHen sar-ba-gareban hain

bilkul chup aur hairan hain

chand bhi hai kuchh khoya khoya

kuchh jaga kuchh soya soya

abr mein chhup chhup jata hai

har tare ko chamkata hai

kuchh bahka bahka chalta hai

pani mein bhaTakta chalta hai

shabnam paT paT roti hai

jo aansu hai wo moti hai

jangal chupka sota hai

manzar par sannaTa hai

har patte mein KHamoshi hai

har konpal mein be-hoshi hai

har zarra chup hai qatra chup hai

aflak ka ek ek tara chup hai

sab gul-ha-e-raihan chup hain

champa ki sab kaliyan chup hain

dariya ki sab maujen chup hain

bal khane wali lahren chup hain

soti hai gulon mein chup KHushbu

jhilmil hote hain jugnu

chalti hai hawa kuchh dhime dhime

phulon ki faza mein chupke chupke

halke halke git sunati

ruk ruk kar ek tan lagati

bhige bhige phul rasile

chupke chupke hain kuchh hanste

ye KHamoshi aur sannaTa

aur ye sakit mauj-e-dariya

in aankhon se kya kya dekhun

is duniya ka har zarra dekhun

ya-rab ye sab manzar kya hain

sahra kya hain ghar dar kya hain

KHamushi kya sannaTa kya hai

aadhi raat ka dariya kya hai

ye sab kyon hai ye sab kya hai

KHud main kya hun 'jamal' kya hai