dariya

ḳhushk kīkar ke peḌoñ ne

lau ke thapeḌoñ ne

dhartī ke betāb siine se

sarsabz dariyā kī mūrat

ubharne nahīñ dī

manoñ miTTī ke nīche

be-shakl tūdoñ

siyah-rang paudoñ ke hamrāh din kāTtā huuñ

guzargāh sad-rang

āñkhoñ meñ bastī hai

giile kināroñ pe peḌoñ ke nīche

do-ābe kī mahkār uḌtī hai

maidānī duniyā kī jānib guzargāh muḌtī hai

dariyā ke giile kināroñ pe

tahzīb paltī hai

uploñ ke phūloñ ke uupar

dahakte tavoñ par

chhanakte hue surḳh hāthoñ kī

chamkīlī poreñ haiñ

tahmad ke phāToñ meñ

abraq sī rānoñ kī

rangat chamaktī hai

gahre salone samay haiñ

falak ke sitāre haiñ

peḌoñ pe peñgeñ haiñ

peñgoñ ke lambe hilāre haiñ

chādar meñ malfūf maddham nishānoñ meñ mad.hosh rahtā huuñ

dariyā huuñ

ik sail-e-mahbūs huuñ

aur andhe bahāv ke andhe tasavvur meñ bahtā huuñ

KHushk kikar ke peDon ne

lau ke thapeDon ne

dharti ke betab sine se

sarsabz dariya ki murat

ubharne nahin di

manon miTTi ke niche

be-shakl tudon

siyah-rang paudon ke hamrah din kaTta hun

guzargah sad-rang

aankhon mein basti hai

gile kinaron pe peDon ke niche

do-abe ki mahkar uDti hai

maidani duniya ki jaanib guzargah muDti hai

dariya ke gile kinaron pe

tahzib palti hai

uplon ke phulon ke upar

dahakte tawon par

chhanakte hue surKH hathon ki

chamkili poren hain

tahmad ke phaTon mein

abraq si ranon ki

rangat chamakti hai

gahre salone samay hain

falak ke sitare hain

peDon pe pengen hain

pengon ke lambe hilare hain

chadar mein malfuf maddham nishanon mein madhosh rahta hun

dariya hun

ek sail-e-mahbus hun

aur andhe bahaw ke andhe tasawwur mein bahta hun