Daro us waqt se

har taraf daur-e-farāmoshī hai

zehn sahmā huā baiThā hai kahīñ

apne atrāf hifāzat kī tanābeñ gaaḌe

jab koī baat nahīñ yaad us ko

phir ye dahshat kā sabab kyā ma.anī

aur hifāzat kā junūñ kaisā hai

Daro us vaqt se jab aisā ḳhauf

jis ke asbāb nahīñ milte haiñ

zindagānī meñ chalā aatā hai

rūh-e-vijdān bhaTak jaatī hai

tarz-e-afkār badal jaatī hai

sahrā aa jaate haiñ dīvāroñ meñ

āsmānoñ ke varaq khulte haiñ

jauq-dar-jauq pare rūhoñ ke

chalte-phirte nazar aa jaate haiñ

aur zamīñ kāñch ke TukḌoñ kī tarah TūTtī hai

vahm tasvīr meñ Dhal jaatā hai

kam-nigāhī kā tasallut chup-chāp

dūr-andeshī ko khā jaatā hai

Daro us vaqt se jab aisā ḳhauf

zindagānī meñ chalā aatā hai

jis ke asbāb nahīñ milte haiñ

har taraf daur-e-faramoshi hai

zehn sahma hua baiTha hai kahin

apne atraf hifazat ki tanaben gaDe

jab koi baat nahin yaad us ko

phir ye dahshat ka sabab kya mani

aur hifazat ka junun kaisa hai

Daro us waqt se jab aisa KHauf

jis ke asbab nahin milte hain

zindagani mein chala aata hai

ruh-e-wijdan bhaTak jati hai

tarz-e-afkar badal jati hai

sahra aa jate hain diwaron mein

aasmanon ke waraq khulte hain

jauq-dar-jauq pare ruhon ke

chalte-phirte nazar aa jate hain

aur zamin kanch ke TukDon ki tarah TuTti hai

wahm taswir mein Dhal jata hai

kam-nigahi ka tasallut chup-chap

dur-andeshi ko kha jata hai

Daro us waqt se jab aisa KHauf

zindagani mein chala aata hai

jis ke asbab nahin milte hain