darwaza

maiñ ik darvāza huuñ

rasta havā kā nīm-shab qadmoñ kā

an-dekhī sadāoñ kā

mirī un se shanāsā.ī bahut mahdūd hai lekin

maiñ un kī āhaTeñ pahchāntā huuñ

maiñ un ko dastakoñ se jāntā huuñ

mire andar hai kyā bāhar hai kyā

mujh ko nahīñ ma.alūm lekin kuchh to hogā jis kī ḳhātir

koī mujh ko kholtā hai band kartā hai

maiñ aksar sochtā huuñ mere pīchhe bhī

koī ganj-e-girāñ-māya hai

koī be-bahā nādir ḳhazāna hai

jabhī to log mujh par qufl ke pahre biThāte haiñ

mujhe shab kī sadā se ḳhauf aatā hai

añdhere kī sadā-e-ḳhāmoshī se

hazāroñ duzd-pā auhām jis meñ raqs karte haiñ

aur aahaT tak nahīñ hotī

maiñ aise dast-e-āvāra se Dartā huuñ

jo be-elān aatā hai

achānak

ek dastak se

mire ḳhvāb-e-girāñ ko toḌ detā hai

magar sab se ziyāda ḳhauf mujh ko is se aatā hai

ki merā kholne vaalā

kisī din qufl kī kunjī ko kho baiThegā

aur mujh ko hamesha ke liye dīvār kar degā

main ek darwaza hun

rasta hawa ka nim-shab qadmon ka

an-dekhi sadaon ka

meri un se shanasai bahut mahdud hai lekin

main un ki aahaTen pahchanta hun

main un ko dastakon se jaanta hun

mere andar hai kya bahar hai kya

mujh ko nahin malum lekin kuchh to hoga jis ki KHatir

koi mujh ko kholta hai band karta hai

main aksar sochta hun mere pichhe bhi

koi ganj-e-giran-maya hai

koi be-baha nadir KHazana hai

jabhi to log mujh par qufl ke pahre biThate hain

mujhe shab ki sada se KHauf aata hai

andhere ki sada-e-KHamoshi se

hazaron duzd-pa auham jis mein raqs karte hain

aur aahaT tak nahin hoti

main aise dast-e-awara se Darta hun

jo be-elan aata hai

achanak

ek dastak se

mere KHwab-e-giran ko toD deta hai

magar sab se ziyaada KHauf mujh ko is se aata hai

ki mera kholne wala

kisi din qufl ki kunji ko kho baiThega

aur mujh ko hamesha ke liye diwar kar dega