dasht hi kafi hai

saañs lene ke liye

qasr-o-kāshāna zarūrī to nahīñ

koī vīrāna koī dasht hī kaafī hai

jahāñ

āsmāñ aur zamīñ roz gale milte haiñ

sub.h-dam bād-e-sabā

shāḳh-dar-shāḳh luTātī hai namī

ḳhushbū phailātī hai āñchal apnā

khilkhilātī huī doshīza kalī ke ruḳhsār

shoḳh bhañvre kī nigāhoñ se shafaq hote haiñ

maḳhmalīñ paañv tale

sabza-e-bālīda koī

chhamchhamātī huī bārish meñ nahā jaatā hai

shaam

darmāñda parindoñ kī panah-gāhoñ meñ

qumqume kirmak-e-shab-tāb ke raushan kar ke

shab kī āġhosh meñ so jaatī hai

an-ginat hīroñ kī nannhī kaniyāñ

jagmagā uThtī haiñ tāroñ ke hasīñ māthoñ par

chāñd duudh kaTorā le kar

būḌhī naanī kī kahānī meñ samā jaatī hai

koī āvāz na saaz

koī naġhma na alaap

na koī bahas na tamhīs na takrār koī

na siyāsat na ḳhabāsat na shamātat koī

iḳhtilāfāt se duur

saare mafādāt se duur

sab ḳhurāfāt se duur

chhal kapaT jhuuT na dhokā na fareb

koī uljhan koī fitna na koī jhuñjhlāhaT

koī shikva na gila

fikr-e-fardā na hī andesha-e-imroz koī

ek anjān masarrat kī kiran

an-chhue ḳhvāboñ kī ThanDī bauchhār

ajnabī sī kisī ḳhvāhish kā ḳhumār

kisī be-nām se ehsās kā lams

arsa-e-jāñ meñ utar jaatā hai

zinda rahne kā amal

kitnā jāñ-baḳhsh nazar aatā hai

saañs lene ke liye

qasr-o-kāshāna zarūrī to nahīñ

koī vīrāna

koī dasht hī kaafī hai

magar

dasht

vo dasht

jise dekh ke ghar yaad na aa.e

sans lene ke liye

qasr-o-kashana zaruri to nahin

koi virana koi dasht hi kafi hai

jahan

aasman aur zamin roz gale milte hain

subh-dam baad-e-saba

shaKH-dar-shaKH luTati hai nami

KHushbu phailati hai aanchal apna

khilkhilati hui doshiza kali ke ruKHsar

shoKH bhanwre ki nigahon se shafaq hote hain

maKHmalin panw tale

sabza-e-baalida koi

chhamchhamati hui barish mein naha jata hai

sham

darmanda parindon ki panah-gahon mein

qumqume kirmak-e-shab-tab ke raushan kar ke

shab ki aaghosh mein so jati hai

an-ginat hiron ki nannhi kaniyan

jagmaga uThti hain taron ke hasin mathon par

chand dudh kaTora le kar

buDhi nani ki kahani mein sama jati hai

koi aawaz na saz

koi naghma na alap

na koi bahas na tamhis na takrar koi

na siyasat na KHabasat na shamatat koi

iKHtilafat se dur

sare mafadat se dur

sab KHurafat se dur

chhal kapaT jhuT na dhoka na fareb

koi uljhan koi fitna na koi jhunjhlahaT

koi shikwa na gila

fikr-e-farda na hi andesha-e-imroz koi

ek anjaan masarrat ki kiran

an-chhue KHwabon ki ThanDi bauchhaar

ajnabi si kisi KHwahish ka KHumar

kisi be-nam se ehsas ka lams

arsa-e-jaan mein utar jata hai

zinda rahne ka amal

kitna jaan-baKHsh nazar aata hai

sans lene ke liye

qasr-o-kashana zaruri to nahin

koi virana

koi dasht hi kafi hai

magar

dasht

wo dasht

jise dekh ke ghar yaad na aae