dast-e-saqi se phir ek jam gira

gul-o-tabassum-e-rangīñ kā ab gila na karo

bahut udaas chaman se nasīm guzrī hai

na jaane kaun sī vaadī se ho ke aa.ī thī

qabā-e-gul se ulajhtī do-nīm guzrī hai

ġhazab huā bharī mahfil meñ dast-e-sāqī se

mai-e-shabāna se labrez jaam chhūT gayā

udaas udaas hai sher-o-adab kā mai-ḳhāna

ki aaj sāġhar-e-rangīñ ik aur TuuT gayā

bharī bahār ke din the ki uTh gayā koī

nigāh-e-shauq meñ sau hasrateñ chhupā.e hue

guzar gayā koī chupke se muskurātā huā

ḳhud apne kāñdhoñ pe lāsh-e-vafā uThā.e hue

uThā kiye haiñ yūñhī mai-kade se dīvāne

ham apne dil pe yūñhī daaġh sahte aa.e haiñ

ise nazākat-e-sāġhar kaho ki tundi-e-mai

shikast-e-jām ko ham maut kahte aa.e haiñ

kahāñ vo daur ki saaqī kī bazm-e-rangīñ meñ

urūs-e-zohd ko baḳhshī ga.ī qabā-e-sharāb

kahāñ ye daur ki mahfil meñ jām-e-rangīñ se

chhalak rahā hai lahū hī lahū bajā.e sharāb

gul-o-tabassum-e-rangin ka ab gila na karo

bahut udas chaman se nasim guzri hai

na jaane kaun si wadi se ho ke aai thi

qaba-e-gul se ulajhti do-nim guzri hai

ghazab hua bhari mahfil mein dast-e-saqi se

mai-e-shabana se labrez jam chhuT gaya

udas udas hai sher-o-adab ka mai-KHana

ki aaj saghar-e-rangin ek aur TuT gaya

bhari bahaar ke din the ki uTh gaya koi

nigah-e-shauq mein sau hasraten chhupae hue

guzar gaya koi chupke se muskuraata hua

KHud apne kandhon pe lash-e-wafa uThae hue

uTha kiye hain yunhi mai-kade se diwane

hum apne dil pe yunhi dagh sahte aae hain

ise nazakat-e-saghar kaho ki tundi-e-mai

shikast-e-jam ko hum maut kahte aae hain

kahan wo daur ki saqi ki bazm-e-rangin mein

urus-e-zohd ko baKHshi gai qaba-e-sharab

kahan ye daur ki mahfil mein jam-e-rangin se

chhalak raha hai lahu hi lahu bajae sharab