dast-e-tah-e-sang

sharq se ġharb tak

arsh se farsh tak

yā karāñ tā karāñ

ek sannāTā phailā huā

merī bekal jabīñ ke tilismāt se

terī bechain bāñhoñ ke ilhām tak

tishna hoñToñ se halchal bhare jaam tak

un kī āñkhoñ ke raushan diyoñ se

mirī arġhavānī ghanī shaam tak

yā karāñ tā karāñ

ek sannāTā phailā huā

kahkashāñ bujh ga.ī rāste meñ kahīñ

rañg-e-nūr-e-sahar luT gayā

āsmānoñ meñ uljhā huā

mai-kadā nuur kā

dil-barān-e-haram

thak ke gumnām rastoñ meñ gum ho ga.e

rañg-e-mahtāb kumhlā gayā

mah-ruḳhāñ

chashm-e-āhū sifat

mast madmātī shāmoñ meñ

hasrat kī dahlīz par

aah bharte rahe

aur sabā raat bhar

zard mahtāb kī aañch meñ

ḳhaak bar-sar bhaTaktī rahī

yā karāñ tā karāñ

ek sannāTā phailā huā

halqā-e-āshiqāñ se lab-e-bām tak

dast-e-sāqī se durd-e-tah-e-jām tak

dīd-e-bīnā se bismil ke anjām tak

mābadoñ kī ḳhamoshī se hañgāma-e-majma.a-e-ām tak

shahr-e-afsos kī tīra-o-tār galiyoñ se

raushan damaktī huī shāra-e-ām tak

yaañ karāñ tā karāñ

ek sannāTā phailā huā

rabb-e-ma.abūd gum āsmānoñ meñ hai

guñg-o-ḳhāmosh hai

bādshāh-e-jahāñ vālī-e-mā-sivā nā.eb-allāh-fil-arz

kaun-o-makāñ

ishq kā mājrā

husn kā mājrā

dard kā mājrā

yā ḳhudā

yā ḳhudā

kuchh sabīl-e-jaza

dil dhaḌakne ko koī bahāna

ḳhudā

sharq se gharb tak

arsh se farsh tak

ya karan ta karan

ek sannaTa phaila hua

meri bekal jabin ke tilismat se

teri bechain banhon ke ilham tak

tishna honTon se halchal bhare jam tak

un ki aankhon ke raushan diyon se

meri arghawani ghani sham tak

ya karan ta karan

ek sannaTa phaila hua

kahkashan bujh gai raste mein kahin

rang-e-nur-e-sahar luT gaya

aasmanon mein uljha hua

mai-kada nur ka

dil-baran-e-haram

thak ke gumnam raston mein gum ho gae

rang-e-mahtab kumhla gaya

mah-ruKHan

chashm-e-ahu sifat

mast madmati shamon mein

hasrat ki dahliz par

aah bharte rahe

aur saba raat bhar

zard mahtab ki aanch mein

KHak bar-sar bhaTakti rahi

ya karan ta karan

ek sannaTa phaila hua

halqa-e-ashiqan se lab-e-baam tak

dast-e-saqi se durd-e-tah-e-jam tak

did-e-bina se bismil ke anjam tak

mabadon ki KHamoshi se hangama-e-majma-e-am tak

shahr-e-afsos ki tira-o-tar galiyon se

raushan damakti hui shaara-e-am tak

yan karan ta karan

ek sannaTa phaila hua

rabb-e-mabud gum aasmanon mein hai

gung-o-KHamosh hai

baadshah-e-jahan wali-e-ma-siwa naeb-allah-fil-arz

kaun-o-makan

ishq ka majra

husn ka majra

dard ka majra

ya KHuda

ya KHuda

kuchh sabil-e-jaza

dil dhaDakne ko koi bahana

KHuda