daulat

aur phir aise huā ānand jab hāzir huā to

budh pahle se hī us ke muntazir the

shahr se tum jis ko apne saath le aa.e ho bhikshū

us ko vāpas bhej do tum jānte ho

bhikshuoñ kā āshram

ye sangh to bas bhikshuoñ ke vāste hai

pīr-o-murshid

aane vaalā koḌh se bīmār hai lekin use ye

zid samā.ī hai ki vo bhikshū banegā

jāntā hai

sangh un sab ke suvāgat meñ khulā hai

jo use apnī panāh-e-āḳhirī mahsūs kar ke

us meñ aanā chāhte haiñ

jab koī dhanvān ye dar khaTkhaTā.e

aur aakar ye kahe vo sangh kā ik rukn banñā chāhtā hai

ham use manzūr kar lete haiñ bhikshū

haañ tathāgat ham faqat ye chāhte haiñ

aane vaalā

bol ham kyā chāhte haiñ

pīr-o-murshid bas faqat ik baat yā'nī

apnī daulat daan kar aa.e tabhī ham

dūsre lafzoñ meñ bhikshū

jo bhī us ke paas hai yā'nī zar-o-sīm o javāhar

biivī bachche ghar zamīñ sab Dhor Dangar

aur apne tan ke kapḌe

saath mat laa.e vahīñ par chhoḌ aa.e to use ham

sangh meñ shāmil kareñge

haañ tathāgat

shahr se jo saath aaya hai tumhāre

us ko kyā kuchh chhoḌnā hai

kuchh nahīñ bhagvān us ke paas to kuchh bhī nahīñ hai

koḌh to hai us kī daulat

jo use pichhle janm se ab virāsat meñ milī hai

pūchh kar dekho agar vo

apnī ye daulat bhī pīchhe chhoḌ aa.e

sangh us ko rukniyat baḳhshegā bhikshū

aur phir aise hua aanand jab hazir hua to

budh pahle se hi us ke muntazir the

shahr se tum jis ko apne sath le aae ho bhikshu

us ko wapas bhej do tum jaante ho

bhikshuon ka aashram

ye sangh to bas bhikshuon ke waste hai

pir-o-murshid

aane wala koDh se bimar hai lekin use ye

zid samai hai ki wo bhikshu banega

jaanta hai

sangh un sab ke suwagat mein khula hai

jo use apni panah-e-aKHiri mahsus kar ke

us mein aana chahte hain

jab koi dhanwan ye dar khaTkhaTae

aur aakar ye kahe wo sangh ka ek rukn banna chahta hai

hum use manzur kar lete hain bhikshu

han tathagat hum faqat ye chahte hain

aane wala

bol hum kya chahte hain

pir-o-murshid bas faqat ek baat ya'ni

apni daulat dan kar aae tabhi hum

dusre lafzon mein bhikshu

jo bhi us ke pas hai ya'ni zar-o-sim o jawahar

biwi bachche ghar zamin sab Dhor Dangar

aur apne tan ke kapDe

sath mat lae wahin par chhoD aae to use hum

sangh mein shamil karenge

han tathagat

shahr se jo sath aaya hai tumhaare

us ko kya kuchh chhoDna hai

kuchh nahin bhagwan us ke pas to kuchh bhi nahin hai

koDh to hai us ki daulat

jo use pichhle janm se ab wirasat mein mili hai

puchh kar dekho agar wo

apni ye daulat bhi pichhe chhoD aae

sangh us ko rukniyat baKHshega bhikshu