dawam

maiñ tumhāre faisle kā hāsil huuñ

tum mujh se be-vaj.h ulajhte ho

maiñ ne jo tumheñ kāmyābiyāñ diiñ

ḳhushiyāñ atā kiiñ

use kyuuñ nahīñ shumār karte

tumhārī harkatoñ se dar aane vaalī

zindagī bhar kī nākāmiyāñ

talḳhiyoñ kī sūrat

jab tumhāre rag-o-pai meñ

paivast ho chukī haiñ

to

tum mujh se ulajh rahe ho

tum ye samajhte ho

ki maiñ koī āzād parinda huuñ

jo jab chāhā jahāñ chāhā

sub.h-o-shām kar liyā

nahīñ

maiñ ek zimmedār mausam kī tarah

apnī uñgliyoñ meñ

huā ke Dor

lipTā kar

dāman-e-āsmāñ par naqsh-o-nigār

banā detā huuñ

main tumhaare faisle ka hasil hun

tum mujh se be-wajh ulajhte ho

main ne jo tumhein kaamyabiyan din

KHushiyan ata kin

use kyun nahin shumar karte

tumhaari harkaton se dar aane wali

zindagi bhar ki nakaamiyan

talKHiyon ki surat

jab tumhaare rag-o-pai mein

paiwast ho chuki hain

to

tum mujh se ulajh rahe ho

tum ye samajhte ho

ki main koi aazad parinda hun

jo jab chaha jahan chaha

subh-o-sham kar liya

nahin

main ek zimmedar mausam ki tarah

apni ungliyon mein

hua ke Dor

lipTa kar

daman-e-asman par naqsh-o-nigar

bana deta hun