december aa gaya hai

yahāñ gorīch chaltī hai

to jaise ruuh chhiltī hai

zamistāñ aa ke ruktā hai

to ik ik rome dikhtā hai

ta.ajjub hai mujhe pal pal

ki ab ke saal vaadī meñ

hamārī shaal vaadī meñ

sunahrī dhuup ab tak parbatoñ par raqs kartī hai

abhī tak saañs kī hiddat laboñ ko garm rakhtī hai

ragoñ meñ ḳhuun kā daurān ab tak hai dopahroñ sā

ḳhizāñ ke zard chehre par sharārat ab bhī baaqī hai

abhī pattoñ ne apne atlasī jaame nahīñ badle

sisaktī aur Dartī shāmeñ ab tak muskurātī haiñ

kyuuñ ab tak titliyāñ phūloñ pe aa ki khilkhilātī haiñ

abhī nīlāhaTeñ bādal ke dhoke meñ nahīñ aa.iiñ

abhī tak naddiyāñ kohre ke qabze meñ nahīñ aa.iiñ

guzishta sab mahīnoñ ko

yahāñ saare makīnoñ ko

ajab ye fikr lāhiq hai

ye apne sard lahje meñ abhī tak kyuuñ nahīñ bolā

ye us be-dard lahje meñ abhī tak kyuuñ nahīñ bolā

december aa gayā hai kyā

yahan gorich chalti hai

to jaise ruh chhilti hai

zamistan aa ke rukta hai

to ek ek rome dikhta hai

tajjub hai mujhe pal pal

ki ab ke sal wadi mein

hamari shaal wadi mein

sunahri dhup ab tak parbaton par raqs karti hai

abhi tak sans ki hiddat labon ko garm rakhti hai

ragon mein KHun ka dauran ab tak hai dopahron sa

KHizan ke zard chehre par shararat ab bhi baqi hai

abhi patton ne apne atlasi jame nahin badle

sisakti aur Darti shamen ab tak muskuraati hain

kyun ab tak titliyan phulon pe aa ki khilkhilati hain

abhi nilahaTen baadal ke dhoke mein nahin aain

abhi tak naddiyan kohre ke qabze mein nahin aain

guzishta sab mahinon ko

yahan sare makinon ko

ajab ye fikr lahiq hai

ye apne sard lahje mein abhi tak kyun nahin bola

ye us be-dard lahje mein abhi tak kyun nahin bola

december aa gaya hai kya