dehat

uf vo jamunā ke qarīñ dehāt kā dilkash samāñ

ūñchī-nīchī sī vo dīvāreñ vo kuchh TuuTe makāñ

rashk ho firdaus ko naqsha hai vo dehāt kā

sabz kaahī kī bahār aur vo samāñ barsāt kā

āsmāñ kartā hai shab-bhar gauhar-e-anjum nisār

phuul kartī hai nichhāvar har sahar bād-e-bahār

vo ravish khetoñ kī jis par taḳhta-e-jannat nisār

kyāriyāñ vo dilrubā ho jalva-e-fitrat nisār

shahr kī ThanDī havā se naḳhl thā har ik nihāñ

thī ḳhas-o-ḳhāshāk paanī par ki ā.īne pe baal

sabz dhānoñ kā vo tā-hadd-e-nazar ik silsila

vo ghane paude nazar ko thī na til rakhne kī jā

thī banafsha sat.h par paanī kī yuuñ aa.ī huī

zulf ho jis tarah ā.īne pe lahrā.ī huī

uf vo sannāTā vo ḳhāmoshī fazā kī muttasil

khaḌkhaḌāyā jab koī pattā dhaḌak uThtā thā dil

lahlahā uTTheñ shajar vo shaam kī ThanDī havā

chhūT vo mahtāb kī baḌh jaa.e paanī khet kā

uḌ rahe haiñ is tarah mauj-e-havā ke saath meñ

jaan goyā paḌ ga.ī hai ḳhaak ke zarrāt meñ

Dūbtā sūraj vo chaḌhtī dhuup vo dilkash samāñ

surḳhī-e-mashriq se vo uThtā huā shab kā dhuāñ

bel har-sū ishq-e-pechāñ kī vo lahrā.ī huī

āsmāñ kī tarah chakkar meñ zamīñ aa.ī huī

uf wo jamuna ke qarin dehat ka dilkash saman

unchi-nichi si wo diwaren wo kuchh TuTe makan

rashk ho firdaus ko naqsha hai wo dehat ka

sabz kahi ki bahaar aur wo saman barsat ka

aasman karta hai shab-bhar gauhar-e-anjum nisar

phul karti hai nichhawar har sahar baad-e-bahaar

wo rawish kheton ki jis par taKHta-e-jannat nisar

kyariyan wo dilruba ho jalwa-e-fitrat nisar

shahr ki ThanDi hawa se naKHl tha har ek nihan

thi KHas-o-KHashak pani par ki aaine pe baal

sabz dhanon ka wo ta-hadd-e-nazar ek silsila

wo ghane paude nazar ko thi na til rakhne ki ja

thi banafsha sath par pani ki yun aai hui

zulf ho jis tarah aaine pe lahrai hui

uf wo sannaTa wo KHamoshi faza ki muttasil

khaDkhaDaya jab koi patta dhaDak uThta tha dil

lahlaha uTThen shajar wo sham ki ThanDi hawa

chhuT wo mahtab ki baDh jae pani khet ka

uD rahe hain is tarah mauj-e-hawa ke sath mein

jaan goya paD gai hai KHak ke zarraat mein

Dubta suraj wo chaDhti dhup wo dilkash saman

surKHi-e-mashriq se wo uThta hua shab ka dhuan

bel har-su ishq-e-pechan ki wo lahrai hui

aasman ki tarah chakkar mein zamin aai hui