dehli ki sair

aao bachcho sair karā.eñ

bhārat kā dil tum ko dikhā.eñ

bhārat kā dil kyā hai bolo

duniyā dekho āñkheñ kholo

har lab par hai jis kā fasāna

dehlī hai vo shahr purānā

shahar ki jis meñ 'mīr' ne gaa.e

rañj-o-ḳhushī ke dilkash naġhme

shahr ki jis meñ 'ġhālib' ne bhī

chheḌīñ shīrīñ ġhazleñ apnī

shahr ki jis meñ shaah 'zafar' ne

ġhazleñ likkhīñ likkhe nauhe

dehlī jo hai shahr purānā

bachcho vo hai dil bhārat kā

vo sambhlā to ham bhī sambhle

vo bigḌā to ham bhī bigḌe

shahr nahīñ tahzīb hai dehlī

shān-e-vatan hai is se baaqī

aao is kā ruup dikhā.eñ

bachcho tum ko sair karā.eñ

laal qil.a hai sāmne dekho

muġhaloñ kī tārīḳh ko samjho

maazī kī tasvīr hai is meñ

ḳhvāboñ kī ta.abīr hai is meñ

vaqt kā ik ā.īna samjho

shām-o-sahar kā ruup bhī dekho

akbar kī talvār yahāñ hai

nūr-jahāñ kā haar yahāñ hai

ālamgīr kī masjid dekho

fan kā namūna us ko jaano

duniyā meñ ik jannat hai ye

apne vatan kī daulat hai ye

laal qil.e se bāhar aao

masjid hai ik sāmne dekho

hai ye nishānī shāh-jahāñ kī

dil kā sukūñ daulat hai yahāñ kī

aao chaleñ ab birlā mandir

bastī dekheñ prem kī jā kar

ye hai dekho jantar-mantar

dekh ke is ko aql hai shashdar

chāho tum to vaqt batā.e

grahan kā bhī ruup dikhā.e

sadr kā aivāñ hai ye dekho

ek gulistāñ hai ye dekho

bāġh-e-muġhal hai is ke andar

apnā guzar hai is se bāhar

ye hai samādhī gāñdhī jī kī

duur nahīñ hai shāñtī-van bhī

rūh-e-chaman ḳhāmosh yahāñ hai

ḳhāk-e-vatan gul-posh yahāñ hai

bachcho chaleñ ab mehraulī bhī

dekh aa.eñ ham laaT qutub kī

us ke chāroñ aur khañDar haiñ

pahle vaqtoñ ke ye nagar haiñ

ambar is se apnī zamīñ hai

ham ko bhī kam faḳhr nahīñ hai

maanā dehlī dekh lī tum ne

sair bhī kar lī kaafī tum ne

mil lo khilaune se bhī chal kar

sāmne hai vo us kā daftar

bhaa.ī jo ilyās haiñ apne

kar lo tum sab darshan un ke

yuuñ to chīzeñ aur haiñ lekin

dekhnā un kā kab hai mumkin

bachcho tum to thak bhī ga.e ho

vaqt bhī kam hai ab ghar lauTo

aao bachcho sair karaen

bhaarat ka dil tum ko dikhaen

bhaarat ka dil kya hai bolo

duniya dekho aankhen kholo

har lab par hai jis ka fasana

dehli hai wo shahr purana

shahar ki jis mein 'mir' ne gae

ranj-o-KHushi ke dilkash naghme

shahr ki jis mein 'ghaalib' ne bhi

chheDin shirin ghazlen apni

shahr ki jis mein shah 'zafar' ne

ghazlen likkhin likkhe nauhe

dehli jo hai shahr purana

bachcho wo hai dil bhaarat ka

wo sambhla to hum bhi sambhle

wo bigDa to hum bhi bigDe

shahr nahin tahzib hai dehli

shan-e-watan hai is se baqi

aao is ka rup dikhaen

bachcho tum ko sair karaen

lal qila hai samne dekho

mughalon ki tariKH ko samjho

mazi ki taswir hai is mein

KHwabon ki tabir hai is mein

waqt ka ek aaina samjho

sham-o-sahar ka rup bhi dekho

akbar ki talwar yahan hai

nur-jahan ka haar yahan hai

aalamgir ki masjid dekho

fan ka namuna us ko jaano

duniya mein ek jannat hai ye

apne watan ki daulat hai ye

lal qile se bahar aao

masjid hai ek samne dekho

hai ye nishani shah-jahan ki

dil ka sukun daulat hai yahan ki

aao chalen ab birla mandir

basti dekhen prem ki ja kar

ye hai dekho jantar-mantar

dekh ke is ko aql hai shashdar

chaho tum to waqt batae

grahan ka bhi rup dikhae

sadr ka aiwan hai ye dekho

ek gulistan hai ye dekho

bagh-e-mughal hai is ke andar

apna guzar hai is se bahar

ye hai samadhi gandhi ji ki

dur nahin hai shanti-wan bhi

ruh-e-chaman KHamosh yahan hai

KHak-e-watan gul-posh yahan hai

bachcho chalen ab mehrauli bhi

dekh aaen hum laT qutub ki

us ke chaaron aur khanDar hain

pahle waqton ke ye nagar hain

ambar is se apni zamin hai

hum ko bhi kam faKHr nahin hai

mana dehli dekh li tum ne

sair bhi kar li kafi tum ne

mil lo khilaune se bhi chal kar

samne hai wo us ka daftar

bhai jo ilyas hain apne

kar lo tum sab darshan un ke

yun to chizen aur hain lekin

dekhna un ka kab hai mumkin

bachcho tum to thak bhi gae ho

waqt bhi kam hai ab ghar lauTo