dekh lo ge KHud!

darḳhto? muntazir ho!

pāniyoñ meñ jhāñkte kyā ho?

khaḌe ho sākit-o-jāmid

ḳhud apne aks kī hairāniyoñ meñ gum

tako ik dūsre kā muñh

raho yuuñ īstāda

pāniyoñ ko kyā

yūñhīñ bahte raheñge

aks jo jhalkegā

sat.h-e-āb bas ā.īna ban kar jagmagā.egī

havā jo mauj meñ aa.ī

to bas lahroñ se khelegī

tumhāre Dagmagāte aks ko

koī sambhālā tak nahīñ degā!

tumhāre apne patte tāliyāñ pīTeñge

san-san sansanāhaT se havā kī

kāñptī shāḳheñ

kareñgī kyā

kanār-e-ābjū mah-rū

takā kartā thā ghanToñ mahviyat se

ishtiyāq-e-dīd kā aalam

har ik patte kī āñkhoñ meñ

tumhārā dilrubā mah-rū

vo ab lauTe bhalā kaise

darḳhto bhuul saktī hai kahāñ

vo shakl

jis ko dekh kar paanī kī āñkheñ

is tarah se jagmagātī thiiñ

ki us ko dekhne

qaus-e-quzah ke rañg

hañste khilkhilāte

aa gale lagte the lahroñ se!

ka.ī ik baar tum ne bhī

usī kī chaah meñ

jhuk kar

havā-e-tez meñ bhī

be-ḳhatar

chūmī thī peshānī isī paanī kī

jo mil kar havāoñ se

jaḌoñ meñ bhar rahā hai nam!

use kis baat kā hai ġham

giroge muñh ke bal to

qahqaha paanī kā sun lenā!

tumheñ apnī tahoñ meñ yuuñ chhupā.egā

ḳhabar tak bhī nahīñ hogī kisī ko

tum yahāñ par the

bahā le jā.egā

anjān se un sāhiloñ tak

aur

vahāñ un sāhiloñ par

ḳhas-o-ḳhāshāk meñ Dhal kar

tumhārī muntazir āñkheñ salāmat rah ga.iiñ to

dekh loge ḳhud

vahī mah-rū

palaT kar jo kabhī aayā nahīñ thaa!

darKHto? muntazir ho!

paniyon mein jhankte kya ho?

khaDe ho sakit-o-jamid

KHud apne aks ki hairaniyon mein gum

tako ek dusre ka munh

raho yun istada

paniyon ko kya

yunhin bahte rahenge

aks jo jhalkega

sath-e-ab bas aaina ban kar jagmagaegi

hawa jo mauj mein aai

to bas lahron se khelegi

tumhaare Dagmagate aks ko

koi sambhaala tak nahin dega!

tumhaare apne patte taliyan piTenge

san-san sansanahaT se hawa ki

kanpti shaKHen

karengi kya

kanar-e-abju mah-ru

taka karta tha ghanTon mahwiyat se

ishtiyaq-e-did ka aalam

har ek patte ki aankhon mein

tumhaara dilruba mah-ru

wo ab lauTe bhala kaise

darKHto bhul sakti hai kahan

wo shakl

jis ko dekh kar pani ki aankhen

is tarah se jagmagati thin

ki us ko dekhne

qaus-e-quzah ke rang

hanste khilkhilate

aa gale lagte the lahron se!

kai ek bar tum ne bhi

usi ki chah mein

jhuk kar

hawa-e-tez mein bhi

be-KHatar

chumi thi peshani isi pani ki

jo mil kar hawaon se

jaDon mein bhar raha hai nam!

use kis baat ka hai gham

giroge munh ke bal to

qahqaha pani ka sun lena!

tumhein apni tahon mein yun chhupaega

KHabar tak bhi nahin hogi kisi ko

tum yahan par the

baha le jaega

anjaan se un sahilon tak

aur

wahan un sahilon par

KHas-o-KHashak mein Dhal kar

tumhaari muntazir aankhen salamat rah gain to

dekh loge KHud

wahi mah-ru

palaT kar jo kabhi aaya nahin tha!