dementia aur jiniyati rafugar

agle vaqtoñ ke ik qissa-go pīr-e-kohna ne phir

dasht-e-be-mājrā se guzarte hue

narm-rau mehrbāñ ḳhizr-qāmat mashīnī farishte se

yuuñ 'arz kī

ai mashīñ-zād

ab merī pīrāna-sālī ke mausam meñ

un dāstānoñ kī chādar darīda huī

vo jinheñ maiñ ne apnī javānī ke

rangīñ taḳhayyul kī khaDDī pe bun kar

kisī nīlmīñ aañkh meñ

nazar ke vāste rakh diyā

yak-ba-yak mere chāroñ taraf

vaqt kī gard aisī uḌī

tāq-e-nisyān par

zard hotī huī

har hikāyat dharī kī dharī rah ga.ī

al-ġharaz

bhuul jaane kā ik 'āriza

jo mirī jīniyātī virāsat meñ likkhā gayā

misl-e-dast-e-'adū

ab mujhe zer karne ko hai

ai mashīñ-zād

muddat huī

dasht-e-be-mājrā kī ḳhamoshī meñ

kahne ko kuchh bhī nahīñ

bas yahī 'arz hai

is ḳhatā-kār ko

haft-iqlīm ke

bā-hunar ḳhush-zabāñ

jīniyātī rafūgar se jaldī milā de

ki maiñ apnī bosīda yādoñ kī chādar marammat karā.ūñ

aur apne qadīmī mahalle ke

ik nīm-tārīk se qahva-ḳhāne meñ

phir agle vaqtoñ ke qisse sunā.ūñ

agle waqton ke ek qissa-go pir-e-kohna ne phir

dasht-e-be-majra se guzarte hue

narm-rau mehrban KHizr-qamat mashini farishte se

yun 'arz ki

ai mashin-zad

ab meri pirana-sali ke mausam mein

un dastanon ki chadar darida hui

wo jinhen main ne apni jawani ke

rangin taKHayyul ki khaDDi pe bun kar

kisi nilmin aankh mein

nazar ke waste rakh diya

yak-ba-yak mere chaaron taraf

waqt ki gard aisi uDi

taq-e-nisyan par

zard hoti hui

har hikayat dhari ki dhari rah gai

al-gharaz

bhul jaane ka ek 'ariza

jo meri jiniyati wirasat mein likkha gaya

misl-e-dast-e-'adu

ab mujhe zer karne ko hai

ai mashin-zad

muddat hui

dasht-e-be-majra ki KHamoshi mein

kahne ko kuchh bhi nahin

bas yahi 'arz hai

is KHata-kar ko

haft-iqlim ke

ba-hunar KHush-zaban

jiniyati rafugar se jaldi mila de

ki main apni bosida yaadon ki chadar marammat karaun

aur apne qadimi mahalle ke

ek nim-tarik se qahwa-KHane mein

phir agle waqton ke qisse sunaun