dharti ka bojh

ek chahal-qadmī ke liye galī banī

samundar ke paas ye phūloñ kī kalī banī

meñ bhī bhūle se yahāñ aa jaatā huuñ

merī umr chalne-phirne ghūmne kī nahīñ hai

aurteñ bachche aur do ik būḌhe bhī aate haiñ

maiñ yūñhī kachhve kī chaal kī tarah

āhista āhista aayā thā

ik jhāḌī ke pīchhe do saa.e ham-āġhosh the

ek ne bā-āvāz-e-buland kahā:

kyā tum ne is būḌhe ko dekhā?

hañsne kī āvāz aa.ī

ye būḌhā dhartī kā bojh hai

maiñ ne sunā magar chup-chāp chaltā gayā

us ne shāyad sahī kahā ye umr chalne-phirne kī nahīñ hai

magar maiñ kyā karūñ doctor ne mujhe sau qadam chalne ko kahā hai

maiñ shurūa se zindagī meñ dhartī kā bojh thā

maiñ ne javānī kirm-e-kitābī ban ke guzārī hai

maiñ ne rātoñ ko jaag jaag kar paḌhā hai

zindagī meñ ilm kī justujū sab kuchh nahīñ hai

ye mujhe tab ma.alūm huā jab maiñ dhartī kā bojh ban gayā thā

ek chahal-qadmi ke liye gali bani

samundar ke pas ye phulon ki kali bani

mein bhi bhule se yahan aa jata hun

meri umr chalne-phirne ghumne ki nahin hai

aurten bachche aur do ek buDhe bhi aate hain

main yunhi kachhwe ki chaal ki tarah

aahista aahista aaya tha

ek jhaDi ke pichhe do sae ham-aghosh the

ek ne ba-awaz-e-buland kaha:

kya tum ne is buDhe ko dekha?

hansne ki aawaz aai

ye buDha dharti ka bojh hai

main ne suna magar chup-chap chalta gaya

us ne shayad sahi kaha ye umr chalne-phirne ki nahin hai

magar main kya karun doctor ne mujhe sau qadam chalne ko kaha hai

main shurua se zindagi mein dharti ka bojh tha

main ne jawani kirm-e-kitabi ban ke guzari hai

main ne raaton ko jag jag kar paDha hai

zindagi mein ilm ki justuju sab kuchh nahin hai

ye mujhe tab malum hua jab main dharti ka bojh ban gaya tha