dhundla lamha

jazboñ kī laḌā.ī meñ

jab kabhī ehsās par vaar ho jaa.e

sab be-kār ho jaa.e

duāoñ kā ek muqaddas silsila

āsmānoñ se apnā naata toḌ Daale

vaqt ham ko vahshatoñ ke havāle kar ke

chup-chāp ruḳhsat ho jaa.e

aur muqaddar bhī panāh dene se munkir ho jaa.e

to ye sab

faqat is baat kā ishāra hai...

ki ḳhud se be-ḳhabar ho kar

jo lamha ālūda kar ke ham ne falak kī taraf uchhālā thā

aaj vahī lamha

āsmānoñ se fatvā le kar

ham par hukmarānī karne aayā hai

jazbon ki laDai mein

jab kabhi ehsas par war ho jae

sab be-kar ho jae

duaon ka ek muqaddas silsila

aasmanon se apna nata toD Dale

waqt hum ko wahshaton ke hawale kar ke

chup-chap ruKHsat ho jae

aur muqaddar bhi panah dene se munkir ho jae

to ye sab

faqat is baat ka ishaara hai

ki KHud se be-KHabar ho kar

jo lamha aaluda kar ke hum ne falak ki taraf uchhaala tha

aaj wahi lamha

aasmanon se fatwa le kar

hum par hukmarani karne aaya hai