dhyan qabr mein utarta KHayal

merā rasta qabristān se ho kar aage jaatā hai

is raste se aur bhī log guzar kar aage jaate haiñ

lekin mere saath hī āḳhir saa.e se kyuuñ rahte haiñ

mere man meñ āḳhir kaisī vīrānī qabroñ kī hai

raat kī ḳhāmoshī meñ jheñgur kī haiñ kaisī āvāzeñ

kuchh din se miTTī kī ḳhushbū

kyuuñ chipkī hai sāñsoñ se

mere paañv ḳhaak se lag kar kis kā mātam sunte haiñ

merā dīvāroñ ke andar dam kyuuñ ghuTne lagtā hai

mere sar par bojh hai kyuuñ katboñ par likkhe harfoñ kā

mujhe agar kī ḳhushbū kyuuñ aatī hai apne andar se

kyuuñ merī āñkhoñ meñ kaḌve tel kā diip sā jaltā hai

merā siina phūloñ se kyuuñ bojhal hone lagtā hai

kyuuñ is raste par chalte maiñ ḳhud se pūchhne lagtā huuñ

maiñ qabroñ ke andar huuñ

yā qabreñ mere andar haiñ

mera rasta qabristan se ho kar aage jata hai

is raste se aur bhi log guzar kar aage jate hain

lekin mere sath hi aaKHir sae se kyun rahte hain

mere man mein aaKHir kaisi virani qabron ki hai

raat ki KHamoshi mein jhengur ki hain kaisi aawazen

kuchh din se miTTi ki KHushbu

kyun chipki hai sanson se

mere panw KHak se lag kar kis ka matam sunte hain

mera diwaron ke andar dam kyun ghuTne lagta hai

mere sar par bojh hai kyun katbon par likkhe harfon ka

mujhe agar ki KHushbu kyun aati hai apne andar se

kyun meri aankhon mein kaDwe tel ka dip sa jalta hai

mera sina phulon se kyun bojhal hone lagta hai

kyun is raste par chalte main KHud se puchhne lagta hun

main qabron ke andar hun

ya qabren mere andar hain