diwali ki raat

rang meñ Duub ke nikhrī hai fazā aaj kī raat

dāman-e-farsh meñ hai nūr-e-ḳhudā aaj kī raat

gudgudātī huī ehsās kā har tār-e-latīf

gungunātī huī phirtī hai havā aaj kī raat

baas kā lams masīhā hai sabā āb-e-hayāt

dard ko DhūñDhtī phirtī hai davā aaj kī raat

oḌh lī raunaq-e-bāzār-o-dar-o-bām ne bhī

ramish-o-rañg kī mahfil kī qabā aaj kī raat

shauq-e-taz.īn se be-sāḳhta mahkī hai hayā

lakshmī-rūp suhāgan ne bharā aaj kī raat

diip hī diip haiñ har samt jidhar bhī dekho

jalva-e-husn-e-tanāsub hai sivā aaj kī raat

jagmagāte haiñ lab-e-bām sitāroñ kī tarah

kar ga.ī naql-e-ḳhudā ḳhalq-e-ḳhudā aaj kī raat

shor aur gul meñ numāyāñ hai tasalsul tartīb

thaap table kī hai aahaT kī sadā aaj kī raat

bachpanā bandish-e-parvā se barābar mafrūr

khel aur kuud meñ hai mast havā aaj kī raat

naar se chheḌ rahe nuur ke dīvānoñ kī

kyā huā haath jalā pair jalā aaj kī raat

bāzī-e-jāñ ke khilāḌī haiñ yahī khelne vaale

dekhiye ye bhī panapne kī adā aaj kī raat

ziist ik mashġhala-e-aish nazar aatī hai

sūrat-e-zinda-dilī kyā na huā aaj kī raat

rang mein Dub ke nikhri hai faza aaj ki raat

daman-e-farsh mein hai nur-e-KHuda aaj ki raat

gudgudati hui ehsas ka har tar-e-latif

gungunati hui phirti hai hawa aaj ki raat

bas ka lams masiha hai saba aab-e-hayat

dard ko DhunDhti phirti hai dawa aaj ki raat

oDh li raunaq-e-bazar-o-dar-o-baam ne bhi

ramish-o-rang ki mahfil ki qaba aaj ki raat

shauq-e-tazin se be-saKHta mahki hai haya

lakshmi-rup suhagan ne bhara aaj ki raat

dip hi dip hain har samt jidhar bhi dekho

jalwa-e-husn-e-tanasub hai siwa aaj ki raat

jagmagate hain lab-e-baam sitaron ki tarah

kar gai naql-e-KHuda KHalq-e-KHuda aaj ki raat

shor aur gul mein numayan hai tasalsul tartib

thap table ki hai aahaT ki sada aaj ki raat

bachpana bandish-e-parwa se barabar mafrur

khel aur kud mein hai mast hawa aaj ki raat

nar se chheD rahe nur ke diwanon ki

kya hua hath jala pair jala aaj ki raat

bazi-e-jaan ke khilaDi hain yahi khelne wale

dekhiye ye bhi panapne ki ada aaj ki raat

zist ek mashghala-e-aish nazar aati hai

surat-e-zinda-dili kya na hua aaj ki raat