diwali

dar-o-dīvār par chhā.ī hai udāsī ġham kī

mahv-e-hairat hai ḳhushī dīda-e-hairāñ kī tarah

koī jhoñkā koī aahaT koī āvāz nahīñ

raat vīrāñ hai kisī shahr-e-ḳhamoshāñ kī tarah

din Dhale dekh liyā thā koī uḌtā bādal

kunmunātī hai fazā mausam-e-bārāñ kī tarah

duur pardes kī rāhoñ meñ bhaTakte raahī

dil meñ phir yaad tirī aa.ī hai mehmāñ kī tarah

vo sar-e-shām dar-o-bām pe jalte dīpak

kyā mirī tarah tujhe yaad nahīñ aate haiñ

raushnī meñ vo nahā.e hue ujle manzar

kyā nigāhoñ meñ tirī aaj bhī lahrāte haiñ

kyā vo biite hue pur-nūr chahakte lamhe

aaj bhī dil meñ tire giit koī gaate haiñ

kyā tire ḳhvāb ġham-e-hāl ke vīrāne meñ

ab bhī maazī kā fasāna koī dohrāte haiñ

vo ujāle jo tirī tarah mujhe bhuul ga.e

duur se ab mirī fariyād nahīñ sun sakte

dil ke tāroñ ko bahut jam.a kiyā hai maiñ ne

vo magar naġhma-e-ehsās nahīñ ban sakte

mirī āvāz ko jazbāt kī dīvār ke paar

sun to sakte haiñ magar sar ko nahīñ dhun sakte

maiñ jo ro.uuñ bhī to ye vaqt ke andhe sāthī

kisī bikhre hue motī ko nahīñ chun sakte

dīp-mālā kī ye bechain bilaktī huī raat

us ke dāman meñ mire ashk-e-ravāñ palte haiñ

ham-safar koī nahīñ hai mirī tanhā.ī kā

chand saa.e haiñ jo hamrāh mire chalte haiñ

DabDabā.ī huī āñkhoñ meñ hai sāvan kī jhaḌī

aur dil meñ mire yādoñ ke shajar palte haiñ

dekh maiñ ne bhī manā.ī hai yahāñ dīvālī

mirī palkoñ pe bhī ashkoñ ke diye julte haiñ

dar-o-diwar par chhai hai udasi gham ki

mahw-e-hairat hai KHushi dida-e-hairan ki tarah

koi jhonka koi aahaT koi aawaz nahin

raat viran hai kisi shahr-e-KHamoshan ki tarah

din Dhale dekh liya tha koi uDta baadal

kunmunati hai faza mausam-e-baran ki tarah

dur pardes ki rahon mein bhaTakte rahi

dil mein phir yaad teri aai hai mehman ki tarah

wo sar-e-sham dar-o-baam pe jalte dipak

kya meri tarah tujhe yaad nahin aate hain

raushni mein wo nahae hue ujle manzar

kya nigahon mein teri aaj bhi lahraate hain

kya wo bite hue pur-nur chahakte lamhe

aaj bhi dil mein tere git koi gate hain

kya tere KHwab gham-e-haal ke virane mein

ab bhi mazi ka fasana koi dohraate hain

wo ujale jo teri tarah mujhe bhul gae

dur se ab meri fariyaad nahin sun sakte

dil ke taron ko bahut jama kiya hai main ne

wo magar naghma-e-ehsas nahin ban sakte

meri aawaz ko jazbaat ki diwar ke par

sun to sakte hain magar sar ko nahin dhun sakte

main jo roun bhi to ye waqt ke andhe sathi

kisi bikhre hue moti ko nahin chun sakte

dip-mala ki ye bechain bilakti hui raat

us ke daman mein mere ashk-e-rawan palte hain

ham-safar koi nahin hai meri tanhai ka

chand sae hain jo hamrah mere chalte hain

DabDabai hui aankhon mein hai sawan ki jhaDi

aur dil mein mere yaadon ke shajar palte hain

dekh main ne bhi manai hai yahan diwali

meri palkon pe bhi ashkon ke diye julte hain