diwane ki jannat

merā ye ḳhvāb ki tum mere qarīb aa.ī ho

apne saa.e se jhijaktī huī ghabrātī huī

apne ehsās kī tahrīk pe sharmātī huī

apne qadmoñ kī bhī āvāz se katrātī huī

apnī sāñsoñ ke mahakte hue andāz liye

apnī ḳhāmoshī meñ gahnā.e hue raaz liye

apne hoñToñ pe ik anjām kā āġhāz liye

dil kī dhaḌkan ko bahut roktī samjhātī huī

apnī paa.el kī ġhazal-ḳhvānī pe jhallātī huī

narm shānoñ pe javānī kā nayā baar liye

shoḳh āñkhoñ meñ hijābāt se inkār liye

tez nabzoñ meñ mulāqāt ke āsār liye

kaale bāloñ se bikhartī huī champā kī mahak

surḳh aariz pe damakte hue shāloñ kī chamak

nīchī nazroñ meñ samā.ī huī ḳhuddār jhijak

nuqra.ī jism pe vo chāñd kī kirnoñ kī phuvār

chāñdnī raat meñ bujhtā huā palkoñ kā sitār

fart-e-jazbāt se mahkī huī sāñsoñ kī qatār

duur maazī kī bad-anjām rivāyāt liye

nīchī nazreñ vahī ehsās-e-mulāqāt liye

vahī māhaul vahī tāroñ bharī raat liye

aaj tum aa.ī ho dohrātī huī maazī ko

merā ye ḳhvāb ki tum mere qarīb aa.ī ho

kaash ik ḳhvāb rahe talḳh haqīqat na bane

ye mulāqāt bhī dīvāne kī jannat na bane

mera ye KHwab ki tum mere qarib aai ho

apne sae se jhijakti hui ghabraati hui

apne ehsas ki tahrik pe sharmati hui

apne qadmon ki bhi aawaz se katraati hui

apni sanson ke mahakte hue andaz liye

apni KHamoshi mein gahnae hue raaz liye

apne honTon pe ek anjam ka aaghaz liye

dil ki dhaDkan ko bahut rokti samjhati hui

apni pael ki ghazal-KHwani pe jhallati hui

narm shanon pe jawani ka naya bar liye

shoKH aankhon mein hijabaat se inkar liye

tez nabzon mein mulaqat ke aasar liye

kale baalon se bikharti hui champa ki mahak

surKH aariz pe damakte hue shaalon ki chamak

nichi nazron mein samai hui KHuddar jhijak

nuqrai jism pe wo chand ki kirnon ki phuwar

chandni raat mein bujhta hua palkon ka sitar

fart-e-jazbaat se mahki hui sanson ki qatar

dur mazi ki bad-anjam riwayat liye

nichi nazren wahi ehsas-e-mulaqat liye

wahi mahaul wahi taron bhari raat liye

aaj tum aai ho dohraati hui mazi ko

mera ye KHwab ki tum mere qarib aai ho

kash ek KHwab rahe talKH haqiqat na bane

ye mulaqat bhi diwane ki jannat na bane