diwar-e-girya

ajab jaadū bharī āñkheñ thiiñ us kī

vo jab palkeñ uThā kar ik nazar taktī to āñkhoñ kī

siyah jhīloñ meñ

jaise machhliyoñ ko aag lag jaatī

hazāroñ surḳh Dore tilmilā kar jast bharte

āb-e-ġham kī qaid se bāhar nikalne ke liye

sau sau jatan karte

magar majbūr the

chāroñ taraf aañsū ke gumbad the

namī ke bulbule the

aur ik dīvār-e-girya

jo azal se tā-abad phailī huī thī

ajab jaadū bharī āñkheñ thiiñ us kī

ba-zāhir aane vaale ko na aane ke liye kahtī

ba-bātin chāhtī dīvār ko vo toḌ kar us tak pahuñch jaa.eñ

khaḌā huuñ maiñ pas-e-dīvār-e-girya

namī ke bulbuloñ ko is kī palkoñ par larazte jhilmilāte

dekhtā huuñ uñgliyoñ se chhū bhī saktā huuñ

magar dīvār-e-girya ko

ufuq se tā ufuq phailī huī

shīshe kī is shaffāf chādar ko kabhī ab tak to koī toḌ kar aage nahīñ aayā

maiñ ik aañsū bhare lamhe kī silvaT

maiñ kaise paar kar saktā huuñ is ko

ajab jadu bhari aankhen thin us ki

wo jab palken uTha kar ek nazar takti to aankhon ki

siyah jhilon mein

jaise machhliyon ko aag lag jati

hazaron surKH Dore tilmila kar jast bharte

aab-e-gham ki qaid se bahar nikalne ke liye

sau sau jatan karte

magar majbur the

chaaron taraf aansu ke gumbad the

nami ke bulbule the

aur ek diwar-e-girya

jo azal se ta-abad phaili hui thi

ajab jadu bhari aankhen thin us ki

ba-zahir aane wale ko na aane ke liye kahti

ba-baatin chahti diwar ko wo toD kar us tak pahunch jaen

khaDa hun main pas-e-diwar-e-girya

nami ke bulbulon ko is ki palkon par larazte jhilmilate

dekhta hun ungliyon se chhu bhi sakta hun

magar diwar-e-girya ko

ufuq se ta ufuq phaili hui

shishe ki is shaffaf chadar ko kabhi ab tak to koi toD kar aage nahin aaya

main ek aansu bhare lamhe ki silwaT

main kaise par kar sakta hun is ko