dil-aram

zamāne ke paañv meñ zanjīr Daalo

ki ye chhipkilī kī tarah reñgtā vaqt

umīdoñ ke shah-par ko chhūne lagā hai

ise rok bhī do

ki ye fīl-pā ab hamāre subuk jism ko rauñd degā

hamāre taḳhayyul ke par toḌ degā

ye sail-e-ravāñ aarzū ke gharauñde kī buniyād ko chaaT legā

agar dauḌtā vaqt merī tarah

ek markaz pe kuchh der Thahrā rahe

niiñd ke devtā

aañkh kī putliyoñ ke jharokoñ se jhāñkeñge

aur aa baseñge

diloñ kī ujaḌtī huī bastiyoñ meñ

ye āñkheñ ki jin kā lahū

rat-jage kī lagā.ī huī aag meñ jal rahā hai

unheñ sard hāthoñ ke mahke hue

lams kī justujū hai

inheñ aarzū hai

ki koī dil-rām

ḳhvāboñ ke gajre sajā kar kahe

''ai mire sar-phire

maiñ yahāñ huuñ yahāñ

kis liye tū mujhe

vaqt kī be-amāñ vus.atoñ meñ kahīñ

DhūñDhtā phir rahā hai''

zamane ke panw mein zanjir Dalo

ki ye chhipkili ki tarah rengta waqt

umidon ke shah-par ko chhune laga hai

ise rok bhi do

ki ye fil-pa ab hamare subuk jism ko raund dega

hamare taKHayyul ke par toD dega

ye sail-e-rawan aarzu ke gharaunde ki buniyaad ko chaT lega

agar dauDta waqt meri tarah

ek markaz pe kuchh der Thahra rahe

nind ke dewta

aankh ki putliyon ke jharokon se jhankenge

aur aa basenge

dilon ki ujaDti hui bastiyon mein

ye aankhen ki jin ka lahu

rat-jage ki lagai hui aag mein jal raha hai

unhen sard hathon ke mahke hue

lams ki justuju hai

inhen aarzu hai

ki koi dil-ram

KHwabon ke gajre saja kar kahe

ai mere sar-phire

main yahan hun yahan

kis liye tu mujhe

waqt ki be-aman wusaton mein kahin

DhunDhta phir raha hai